Saturday, May 24, 2008

محفوظات

في أيام الامتحانات يبدو البيت صامتا وكئيبا وخاليا من تعليقاتها المرحة التي تبهج أيامي
يقول لي أنك من معجبين ابنتك .. ترقبينها بشغف غير شغف كل أم بابنتها .. التوازن نصيحتي .. خطأ قاتل أن يقع الطبيب في حب المريض
أنا أم وهي ابنتي

تجيئني مكفهرة : سمعيلي
وتبدأ في التسميع
أهلا بنابتة البلاد ومرحبا
جددتم العهد الذي قد أخلقا
لا تيئسوا أن تستردوا مجدكم
فلرب مغلوب هوي ثم ارتقي
فتجشموا للمجد كل عظيمة
إني رأيت المجد صعب المرتقي
عار علي ابن النيل سباق الوري
مهما تقلب دهره أن يسبقا

هي : إشطة كدة
أنا : بلاش كدة..لغتك لازم تكون علي مستوي اللي بتحفظيه
هي : هو دة سبب وجود قصيدة حافظ ابراهيم في المنهج يعني .. طيب ما أنا لغتي كويسة .. والبركة في أفلام الكارتون المدبلجة .. ومواضيع التعبير بتاعتي فول مارك دايما .. دي دي تحف فنية
أنا : ما هو انت بقيتي كدة من كتر القراءة

هي : بس هي قصيدة مش منطقية ومش متوافقة مع منهج التاريخ ‏..احنا طول عمرنا محتلين وثورات وحروب وكدة ..ازاي بأة ابن النيل سباق الوري .. متهيألي حافظ دة كان حافظ مش فاهم .. أو يمكن يعني زي شعراء زمان قوي اللي كانوا بيقبضوا
أنا : هو انت درست قصائد مديح الحكام .. امتي .. ما ذاكرناش حاجة كدة
هي : فعلا .. دي معلومات عامة
أنا : برافو عليكي طالعة لمامتك .. اديني مثال كدة
هي : مثال مثال .. قصيدة واحد مننا للشاعر عمرو بن دياب

أنا :‏ بنت ‏..‏ عيييب كدة
ياللا النص التالي
هي : اختر قرينك واصطفيه تفاخرا
ان القرين إلي المقارن ينسب
ودع الكذوب فلا يكن لك صاحبا
إن الكذوب يشين حرا يصحب
وزن الكلام إذا نطقت ولا تكن
ثرثارة في كل ناد تخطب

أنا : كملي
هي : لا أنا معترضة علي البيت الأخير .. ثرثارة مؤنثة ودة معناه إنه بيخص الستات بالثرثرة
أنا : هو الشرح فيه كدة
هي : لا طبعا .. ولما قلت كدة للميس اتنهدت وسكتت .. دة شاعر اسمه صالح ابن عبد القدوس من العصر العباسي .. يعني المجتمع الذكوري المتعفن من زمان يا ماما

أنا : ولا كلمة زيادة حلي سبعتاشر امتحان علي ما اخلص الغدا

يبدو انه يجب علي مراقبة نفسي جيدا في البيت .. كل كلمة بتتسجل وبتكون أفكار .. ودة مش حلو لعقلها الباطن

اسمع كوكو يشاغب معها
واسمعها
ابعد عني دلوقتي لأشرحنك .. خسئت .. ثكلتك أمك
كوكو يرد مرعوبا
بعد الشر عليا


:D

Labels: تأملات, شئون خاصة, مرأة

Posted by بثينــــــة :: 4:05 AM :: 12 Comments:

Post a Comment

---------------------------------------

Monday, May 19, 2008

الغازية لازم تنزل

‎ ‎زمان إذا تزوج الرجل من راقصة في مجتمعنا كان يقال أنه "خرنج" .. و يصيح الصائحون :الغازية لازم تنزل .. وربما توجهوا لبيته بالمشاعل في تعبير شعبي جارف عن القرف و ضياع "الشرف" كما كنا نري في أفلام الأبيض والأسود .. هذا كان فيما مضي وراح وانقضي .. الآن لم يعد هناك غوازي بالمعني السابق .. صار هناك أمر آخر
كانت الغازية زمان لا تطمح بغير الرقص في الأفراح والموالد وورائها فتوة واحد يمنعها من الاستقامة لو فكرت فيها و يشاركها أجرها و يسيطر عليها بدعوي حمايتها .. كانت تعد استثماره ورأس ماله
الآن .. الراقصة .. مؤسسة متكاملة .. يعتمد علي هز وسطها جمع غفير من البشر .. بيوت مفتوحة .. أفراد فرقة موسيقية .. مدير أعمال .. صحفيون ورجال أعمال ومذيعون و برامج وأفلام وقنوات و

مدارس

لم يعد الأمر محتقرا .. ربما كان هناك من يري مثلا فكرة إحياء راقصة محترفة لحفلة مدرسية نوع من "العولمة" .. ربما قال البعض :"طبيعة عملها" ..ربما برروا ذلك لزيادة دخل المدرسة ودعاية أكبر لها في ظل تحول المدارس لدكاكين .. ربما هاج أحدهم هنا أو هناك ل "يشجب" الفعلة ..لكنهم كمن يحارب الطوفان .. لقد نحي الكثيرون التفكير في لب الموضوع .. لأنه صار "عقما فكريا" في زمن الفياجرا الإعلامية .. وأصبحت الفكرة .. فكرة تقبل وجود الراقصة بكيانها اللامع في معقل المراهقين .. فكرة عادية .. وربما بارك الأمر المدرسون وأولياء الأمور .. ورأوه عوده لاهتمام المدارس للاهتمام ب"الرياضة" في أسمي صورها
لقد أصبح "شرفا" لفلان أنه زوج الفنانة الراقصة الاستعراضية .. أصبح من الجائز أن تمثل دولتنا "راقصة" علي رأس وفد ثقافي في المحافل الدولية .. وأصبح من العادي أن تطالعك صورتها في أول نتائج البحث في أي محرك بحث عندما تكتب اسم بلدنا
وكما قال الزعيم الفنان المرشح لوزارة الثقافة في إحدي مسرحياته : لو كل واحد ساب بيته علشان جارته رقاصة البلد كلها هتبات في الشارع

‏!‏‏!‏
زعيم حقيقي .. إن كان يقصد أن الراقصة ليست فقط تلك التي تهز وسطها .. كثيرون وكثيرات .. راقصات .. بمعاني مختلفة و أساليب مختلفة .. الكل "يهز" بأسلوبه الخاص .. ويتحلق حوله حشد كبير من المنتفعين الذين يباركون "هزه" ويسوقون له .. ويبررون "تضحياته" بل ويرون فيه قدوة
هناك تغير حادث ويحدث في مجتمعنا ولا نستطيع دفعه لضآلتنا وخرسنا أمام آلة الإعلام الجهنمية التي تؤله "عديمي الشرف" وتبرئهم مما يعلق بطهارتهم من أقاويل الحاقدين .. صار اللص نبيا .. والناهب قديسا .. و
الراقصة رمز
والرموز .. صعب جدا أن تجد من ينادي بها الآن : الرمز دة لازم ينزل

....
أشعر أني ظلمت ابني وحرمته من حقه في ممارسة العولمة والتعرف عليها "عن كثب" بكاميرا المحمول لأنه مسكين بمدرسة تجريبية .. ربما يجب علي إعادة التفكير

Labels: تأملات

Posted by بثينــــــة :: 8:58 PM :: 19 Comments:

Post a Comment

---------------------------------------

Saturday, May 17, 2008

كيف تفقدين رجلا في عشر سنوات

الفيلم كان لممثلين لا أعرفهم ..ربما كنت أعرفهم فيما مضي وقت أن كنت امتلك من نفسي جزءا يتيح لي مشاهدة أفلام أجنبية والاستمتاع بها..أشعر الآن عندما أتابع فيلما أني عدت في الزمن..أو أن الزمن عاد إلي ليذكرني أني كنت أمتلك قائمة 'مفضلة' للأشياء أجبرتني الحياة علي تجاوزها وربما 'تدليتها' والوقوف فقط عند صفحة 'الهوم بيج'..ماااا علينا
الحقيقة أنا أيضا أدين للأفلام الأجنبية كثيرا..فقد ساهمت فعليا في تحسين لغتي..وكانت بديلا عن أمنياتي الدائمة بالسفر..برضه مااااعلينا
الفيلم اسمه

how to lose a guy in 10 days
دعونا من محتوي الفيلم تفصيليا..فأحداثه بعيدة عن مجتمعنا يمكن..أظن..ربما..لا أدري أحوال الشباب هذه الأيام..كل شئ قابل للخبطة والتغيير
لكن ما جذبني في الفيلم هو الفكرة : كيف تفقدين رجلا في عشرة أيام..كيف تقوم امرأة بكل الأشياء التي يمكن أن تتسبب في هروب الرجل منها

طبعا الفكرة غير واقعية في نظر الكثيرين..أقصد الكثيرات..وخاصة أولئك اللاتي لم يصادفن الرجل الذي يرغبن في تطفيشه..حيث أن العثور علي رجل يعد 'أمله' في أيامنا الكحلي تلك..ويجب العض عليه بالنواجذ وليس العكس.. وذلك لأسباب كثيرة أولها عارفينه وهومتطلبات الزواج الباهظة وآخرها زيادة وعي الطرفين عن زمان وبالتالي زيادة متطلبات كل طرف في شريك حياته المنتظر
نحن نتمازح
الموضوع كله مزحة
ثقيلة وبايخة لكنها مزحة قد تفيد
وكما هو واضح..الفيلم كان يناقش الفكرة بطريقة عكسية لإيضاح أسباب هروب الرجل من المرأة..هناك

وفي محاولة للتمصير والتعريب وجدت أن الفكرة تقبل وترحب علي أن تكون المدة عشر سنوات توافقا مع نفسنا الطويل..واستبدال البوي فريند بالزوج أوقع
وكلمة الفقد والتي قد تترجم بالإنجليزية إلي
breaking down a relationship
يمكن ترجمتها في مفاهيم مجتمعاتنا إلي نضوب معين الحب مع عدم الاعتراف بذلك أو..الاعتراف بذلك مع الإنفصال الداخلي لإبقاء ما يسمي بكيان أسرة أو..في أعظم الأحوال الطلاق ..التسريح بإحسان..هذا هو الفكر .. هنا

إذن

كيف تفقدين زوجك في عشر سنوات يا عزيزتي وذلك بفرض نجاحك في الحصول عليه..والحصول منه علي أطفال يشبعون أمومتك..ورغبتك بأة في أن تصيري 'ملكة'..ملكة النحل ..التي تلقي بذكرها خارج الخلية بعد أن أتم مهمته

وش نسائي شرير وحاطط ليب ستيك
:D
بدون ضحكات أو انتقادات
أقر مبدئيا أنه سؤال عبثي وليس تحريضي بتاتا البتة..ربما هو يحرض فقط علي التفكير للوصول لحياة سعيدة كما نأمل جميعا

الإجابة
أولا: عليك أن تكوني رخيصة-ماديا- وغير مكلفة وألا تكلفيه فوق طاقته عند الزواج..سيظل هذا في ذاكرته دوما ويشعر أن الأمر بسيط ويمكن تكراره أو..أنه يسهل التخلص منك ببساطة وبدون خسائر مادية..أو أنك كنت تسعين للإيقاع به حتي تتمكنين منه..سيظنه سلاح وليس قناعة ..فبدون تفكير ..يخلع..أو يدفعك لخلعه..واحد

ثانيا: عليك ألا تقارني بينه وبين آخرين علنا لا أمامه ولا بينك وبين نفسك لأنك طبعا ترينه فوق مستوي المقارنات..ولأنك بنت ناس وتحترمين زوجك ولأنك تعلمين أن رضاه من رضا الله..داومي علي هذا..ولا تعتقدي أنك بهذا ستنالين وساما..بالعكس..أبسوليوتلي ستتضخم ذاته حتي تضيق بذلاته ويصل لمرحلة الشعور بأنه يمن عليك بمجرد تواجده معك..وأنه كثير عليك الحياة مع شخص بروعته..فتنالين شلوتا معتبرا يطيح بك من جنته

ثالثا:‏ عليك أن تنمحي..رأيك هو ظل لرأيه ومن أول يوم..لا معني لشئ اسمه المناقشات..اجعليه سي السيد فيحاول أن يجد ذلك في كل من حوله ويفشل طبعا فيبدأ بالحقد عليك..والشعور بأنك تعاملينه كطفل..أو .. ربما ظن أنك بلهاء بالفعل وستقولين له عندما يقرر الهروب منك: وماله يا أخويا اللي تشوفه

رابعا: عليك أن تنسي نفسك..وطموحاتك التي كان يعرفها فيك..لتتفرغين لدفعه قدما في عمله.. فتصبحين في نظره بلا شخصية مميزة ..بلا بصمة..عليك أن تتحولي إلي كائن عبيط بلا فكر ولا هوية ولا حياة عملية ناجحة..ولا علاقات اجتماعية سعيدة.. سيجد وقتها عذرا ليقول لك: أوروفوار..حياتنا مملة..طريقك أخضر

خامسا: عليك ان تهتمي بمظهرك ورشاقتك .. فهذا يثير فيه إما نوازع دينية تدفعه لمحاصرتك بالممنوعات والمحظورات في اللبس فتتدهولين ويكون هذا عذرا للهروب منك.. أو..قد يثير ذلك غيرته عليك ويتخذ من حسن مظهرك سببا للهروب..تذكري : الرجال لا يتزوجون الجميلات

سادسا:‏ عليك أن تحاصريه بمشاعرك ليل نهار..كوني دافئة دوما ‏..سيهرب بالتأكيد لأنه لا يملأ عينيه إلا التراب..عادة .. ولأن تسعة وتسعين وتسعمية تسعة وتسعين من ألف من الرجال يكرهون المرأة المدلوقة.. يريدون صيدا صعبا..سيجد مشاعرك عبئا وربما ظنها حبلا تشدين وثاقه به.. ولهذا..سيبادر هو بدلقك

سابعا: عليك أن تفضليه علي أهلك..وتشعرينه بذلك..وتأخذي المواقف المؤكدة لذلك..لن يكون هذا في ميزانك يا عزيزتي..سيفكر بأمرين لا ثالث لهما..إما أنك بلا أهل ويسهل دهسك واغتصاب حقوقك أو..أنك قد قمت ببيع أهلك في سبيل رجل-وإن كان هو ذلك الرجل- لذا سيسهل عليك بيعه..فيبادر طبعا ببيعك بخسا وببلاش كدة

ثامنا: إذا من الله عليك بالذرية كوني أما حانية عاقلة متفهمة ..لا تعارضيه أمام أطفالك..سيصبح هذا مؤرقه..سيظن أنك تنافسيه في حب أطفاله وسيحب أن يريك أنه قادر علي تربيتهم وحيدا وبدون مثالياتك الفارغة..سيرغب في إثبات ذاته وقدراته 'كأم'..جنان بعيد عنك


ليس هناك من تاسع بنظري..ربما كان هناك المزيد الذي لم يخطر ببالي..ولكني اكتفي .. وانصحكم بالتفكير والتفكير العكسي..فربما..من الجائز..ماااااعلينا

Labels: تأملات, لحظات داكنة, مرأة

Posted by بثينــــــة :: 5:02 PM :: 19 Comments:

Post a Comment

---------------------------------------

Wednesday, May 14, 2008

المتحدثون إلي أنفسهم

‎


كان صحوا معتادا متأخرا في يوم ثلاثاء لا يميزه كأي ثلاثاء سوي انحناء الأسبوع في اتجاه النهاية للوصول إلي ما أقنع نفسي أنهما يوما الأجازة المشهودان..حيث الراحة التي اكتشف أنها خدعتي الأبدية التي أتمكن بها من إدارة قرص الأيام
كنت'أحث' نفسي علي الإسراع-بصوت منخفض علي ما أظن- وأنا أكاد أركض
وفي ذلك الثلاثاء استطعت الحصول علي تاكسي بسرعة بعد تفاوض قليل مع سائقه..فبعد ارتفاع اسعار البنزين أصبحت أجد لهم العذر..نوع من التعاطف الإنساني .. المهم .. انطلق الرجل متبرما رغم الأتفاق المرضي ..ونفسه تحدثه-وأكاد أسمعها- بزبون جديد في نفس الاتجاه ..لا ضير في تحويله لميكروباس شيك مادامت السماجة موجودة
بدأ السائق ككل سائق في سب المارة وقائدي السيارات والدنيا وما فيها..ورغم أن كل سبابه تقريبا في محله لذهولة المارة كما لو كانوا جميعا يبغون الإنتحار..ورعونة قائدي السيارات وكأنهم جميعا كارهين للحياة.. ورغم ذلك إلا أني تمسكت بفضيلة الصمت ولم أعلق
وجاءت اللحظة التي علقنا فيها بتلك الإشارة ..همست لنفسي بصوت منخفض علي ما أظن..بأنني رغم تأخري عن العمل ورغم أن ماكينة الدخول تكاد يوميا تغلق من دوني إلا أنني لم أتمالك من الشعور بالراحة فقد كنت بحاجة لصمته
وعلي جانب الطريق كان هناك ذلك الرجل..لا يختلف في هيئته عن معظم من في سنه من السائرين بكرش متوسط وشعر رمادي لكنه منكوش قليلا وبنطلون كالح وقميص متهدل لاحظت كرمشته وبقعه
كان يستند إلي سور من خلفه و.. يتحدث
يتحدث وحيدا
السائق: الراجل بيكلم نفسه..أهو ع الصبح أهوه حاجة تحزن وتقطع القلب

ليه كدة بس يارب..يارب عافينا
أنا ‏..‏ صامتة
السائق: علي فكرة دة مش أول واحد أشوفه كدة .. دول كتير أوي .. وبيكتروا
أنا..صامتة
السائق: بس دة شكله مجنون جديد مش كدة..يعني لسة هدومه نظيفة يادوبك شعره منكوش..لسة ما اتبهدلش
أنا .. صامتة
السائق: تفتكري حضرتك الراجل دة إية اللي جننه..يمكن مراته..لا مؤاخذة يعني يا مدام..بس الستات مش هم بس سبب جنان الرجالة اليومين دول..دة كان زمان أيام العز..آه..أصل لا مؤاخذة الواحد لما يكون شبعان ومستريح يبدأ يفكر بأة في أحواله العاطفية..يقرف اللي معاه ولا يهنيه..كدة يعني.. ما كانش فيه غير مشاكلنا اللي جوة مننا هي اللي كانت بتجنن الناس..الخرعين يعني..علشان كدة ماكانش فيه مجانين كتير..وللا إية
أنا .. صامتة
لكن بعيد عنك الواحد لما بيفلس ويقرب يشحت بيبقي متنيل علي عينه..زي المسمار بياخد فوق دماغه وبس..مش ملاحق .. ومش عارف الضربة جاية منين..مسكين الراجل دة..لبسه بيقول كان محترم.. يا تري إية خللي أبلاتينه لدع كدة.. يا تري الأسعار ولا الأمراض ولا الفقر ولا البطالة ولا العيال ولا الخنقة..ولا ولا ولا

دامت الإشارة ربع ساعة ولم يكن الرجلان قد توقفا عن الحديث..كلا يحدث نفسه..أحدهما غير مدرك أن لا أحد يسمعه .. ربما هو خارج نطاق عالمنا أصلا .. والآخر يدرك أنني أسمعه لكنه يريد ربما الصراخ .. ليزيل الصخرة الجاثمة علي صدره..كما الجميع




‎

Labels: تأملات

Posted by بثينــــــة :: 1:02 PM :: 10 Comments:

Post a Comment

---------------------------------------

Saturday, May 10, 2008

برنامج إذاعي

احم
في الحقيقة أنا فوجئت باختيار الموقع ده

http://dear.to/cairo

لبوست الأسامي دة

http://tayarawara2.blogspot.com/2008/03/blog-post_13.html
علشان يشيروا إليه في برنامجهم عن الإنترنت في إذاعة البرنامج العام

وقالوا في تعليقهم علي أحد البوستات هنا

ان الحلقة سوف تذاع الأحد حداشر مايو الساعة تسعة وعشرة صباحا
الحقيقة لازم أشكرهم طبعا لأنهم شافوا في البوست حاجة وأشكر لهم اهتمامهم
لكن كمان دة خلاني احاول افتكر التوقيت دة في البرنامج العام..مش متأكدة .. لكن أعتقد إنه كان بيذيع برنامج اسمه : أنت تسأل والكمبيوتر يجيب
فاكرينه
كان بيتبادل تقديمه مذيع ومذيعة وكانت المقدمة الموسيقية مرعبة شوية
وزمان جدا قبل ما يبدأ البرنامج القديم كان الكمبيوتر اللي عندي حاجة كدة اسمها سنكلير

كان بيشتغل بمساعدة الكاسيت
وأعتقد إنه كان جيمز فقط و أبيض وأسود بس
وبعدين بدأ يظهر الكمبيوتر أبو شاشة سوداء وكان دوس دوس
dos
:D
وكان سعره أأررببعع تلاف جنيه وقتها
في الكلية عملوا لنا خدمة وعملوا قاعة كبيرة لتأجير الكمبيوتر بخمسة جنيه في الساعة
وطبعا كنت باقعد اجرب وأدي أوامر
وكان أكتر استجابة منه هي
bad command
:D
ولما كنت باسمع البرنامج وألاقيه بيجيب معلومات من هنا وهناك كنت باتساءل طيب هو الكمبيوتر هيجيب منين إجابات..ما هو أنا لازم أديله معلومات الأول علشان أسأل وهو يجيب
وكنت باتخيل المذيعين وهم بيسألوا والكمبيوتر يقوللهم
bad command
أو يمكن فيه واحد صعيدي مجعمذ جوة وهيجاوب

:D
وبعدين ياسادة يا كرام.. اشتريت الكمبيوتر سنة تمانية وتسعين وفي خلال وقت قصير بدأت أعرف إن فيه حاجة اسمها انترنت وهنا بأة الدنيا نورت
كدة طبيعي ..لأن فيه ملايين الناس بيدخلوا معلومات وملايين تانيين ممكن يسألوا بأة والكمبيوتر يجيب
هوه دة
علي كل حال أظن البرنامج دة هو التطور الطبيعي للبرنامج الأب .. وأظنه قائم بأة علي أساس مضبوط..لأن الانترنت أكبر مصدر معلوماتي في عصرنا الحالي
إن شاء الله تلاقوا فيه فايدة ومتعة حتي لو طنشوا بوست الأسامي .. دة لو كنتم من مستمعي الإذاعة ومن مدمني الويب..زي حالاتي


.........
ملحوظة
اعتذار واجب عن عدم وضع اللينكات بطريقة لطيفة.. قصور تقني..سامحوني

Posted by بثينــــــة :: 12:58 AM :: 25 Comments:

Post a Comment

---------------------------------------

Thursday, May 08, 2008

كورديليا

تقول وعيناها تدمعان :أحبك للأبد .. بينما هي تعني بهذا ال 'أبد' سنوات عمرها الباقية ..فقط..فهذا كل ما لديها .. أقصي ما لديها..لا تملك شق قلبها لتضعه..لا تملك أن تعود بالزمن لتحبه منذ لحظة ميلادها البعيدة
هي ليست كورديليا الابنة الصغري للملك لير صنيعة شكسبير..تلك التي أحبت أباها حبا جما وعندما سألها التعبير عن حبها أجابت :أحبك كما يقتضي الواجب..وكما تمليه أبوتك وبنوتي
ليست بجلافتها وبغياب كياستها لكنها بصراحتها وبكارة مشاعرها..هي تحبه لأنه أهل للحب ولأنها ‏.. ولأنها
الحب لا يبرر
لكنها ربما تجد عناء في التعبير عن ذلك البرق الذي أضاءها يوما..ولا يزال

هي ترجف
خوفا من الفقد
فقد ذاتها
أو قدرتها علي الحب
أو.. فقد وجوده المتباعد

فقد قطرات من ندي صباحه
أو رائحة عطره العالقة بها منذ زمن
هي ليست كورديليا الأولي التي دفعت بأبيها إلي حافة الجنون
وليست كورديليا التي حاولت إنقاذ أبيها فداسها المتآمرون وأعدموها
فما زال حبيبها في يقينها المنقذ لكل أحلامها
فارسها
وسندها
ليس بها من كورديليا غير لحظة تتكرر ..تسأل فيها عن مشاعرها فتجيب بما يجب أن يقال وليس بما يختلج بداخلها
‏_‏___________

ما تخشاه حقا : مصير كورديليا

Labels: تأملات, مرأة

Posted by بثينــــــة :: 11:57 PM :: 4 Comments:

Post a Comment

---------------------------------------

Tuesday, May 06, 2008

مهموز مقاس تسعين

طيارتي الورق تشابكت خيوطها بشكل كبير الفترة الماضية..سكنت واستقرت تحت سقف البيت ..ماعدا يومي الإضراب..طبعا..وتفتفتت أوراقها بفعل وطء الأقدام والأحداث الضاغطة
والآن..أشعر أن عليها التحليق مجددا بعدما ثبت أنها لا تستخدم وقودا سوي قوة الرياح وهي الشئ الذي لم تتمكن حكومتنا من تسعيره ..لرفع سعره ..حتي الآن
وقبل أن أحلق ثانية كان هذا الاجتماع ..الذي أملي حدوثه في بيتنا ذلك المهموز الأخير

كانت الخطوة التالية في مسيرة بيتنا المبارك هي عقد اجتماع عاجل للهيئة الداخلية للمجلس الأعلي للجنة القومية للشئون المنزلية
وكما نفعل دوما جمعتنا المائدة المستديرة (ترابيزة السفرة) التي تتحول إلي بيضاوية في إحدي حالتين
وجود زوار معزومين.. أيام ما كااااان فيه عزومات .. (دمعات محبوسة) ياللا ما علينا
أو
نوبة ديكتاتورية تصيب رب الأسرة فيقرر أن "يتصدر" شئ

اجتمعنا عليها بعد أن صارت بيضاوية..لا كلام يقال .. كان المهموز أكبر من استيعابنا جميعا

بعد ما .. ما .. اتمهمزنا .. بشكل علني وفاضح وفج فأنا مدين بالاعتذار لأني في البوست السابق -انظر الأرشيف- ظلمتكم ووقفت‏ موقف بوهيمي سفسطائي فاشل..وبين البوستين قمت بإلغاء حساباتكم علي الفيس بوك ودة كان رد فعل طبيعي خوفا عليكم مما هو أكثر من المهاميز الجماعية..والآن..لنواجه الأمر..سيتكرر السيناريو..بصورة أكثر سماجة ولقد اتخذت قرارات أرجو أن تساعدوني علي تنفيذها

تم تم تم تم لا تتنحي

اخرس يا ولد

مبدئيا بالنسبة للسيارة

أقترح نحولها لتاكسي

اخرس يا ولد

بالنسبة للسيارة..كل واحد منكم يلتزم بالباص الخاص به..ممنوع تاكسيات نهائي..والسيارة لي أنا

أنانية مفرطة

اخرس يا ولد

سيتم الغاء سفرنا كل أسبوعين لزيارة جدو ‏..السفر كل ثلاث شهور لأن التفويل سيتكلف سبعين جنيه أي أن الرحلة ستتكلف مائة وأربعون جنيه..أي مائتين وثمانون جنيه شهريا..حرااااام

‏

عقوق والدين

اخرس يا ولد

يتم تخصيص علبة تبرعات يومية في درج الكومودينو الشمال.. التبرع اليومي لكل فرد جنيه لمواجهة رسوم تجديد الرخصة ولزوم الرشاوي والإكراميات

يا رااااشي

اخرس يا ولد

بالنسبة لميزانية البيت..أنا أناشد ضميركم الحي..النبي علي قلبكم ترحموا ما في الثلاجة يرحمكم من في السماء
‏
يا مجوعنا

اخرس يا ولد

بالنسبة للسجاير..سيتم استبدال ال ام بسجائر كيلو باترا كينج سايز..حد يعترض ويجاملني

هو لسه فيك نفس..روح ولع في نفسك أحسن

اخرس يا ولد

بالنسبة للغاز والكهرباء والمياه والتليفوناااات..ترشيد ترشيد ترشيد أستحلفكم بالله

خنيق

اخرس يا ولد

بالنسبة للجرائد والمجلات والكتب واشتراك النت ..امتناع تااااام

اقترح تطلق الست دي

اخرس يا ولد

بالنسبة للعرض الخاص بشركة ام اف اع للعمل في الخارج بالنسبة لي ‏..كما تعلمون أنا كنت رافض بشدة وعنف نتيجة لرغبتي في الاستقرار وكنت فاكر ان الحياة ممكن تبقي بمبي غامق ..بس ..سيتم طرح العرض للتصويت

يالاااااهوي

بصوت عالي جدا :اخرس يا ولد

فين الولد..كوكو مش هنا أصلا

مش هنا..أمال مين قارفني من الصبح

الظاهر .. صوت الضمير اللي لسه حي..أنا باقترح نولع فيه بسولار..بلاش بنزين تسعين

Labels: تأملات, شئون خاصة

Posted by بثينــــــة :: 6:50 PM :: 5 Comments:

Post a Comment

---------------------------------------

Friday, May 02, 2008

وقد أخذت يمينه ما منحت شماله

لولولولي

تلاتين..تلاتين..‏ عارف يعني اية تلاتين

واضح انك كالعادة عايمة في مية البطيخ ومش فاهمة

طيب فهمني..دة مكتوب في الجريدة الرسمية اللي استخسرت اجيبها انها بدون حد أقصي ..يعني مافيش سقف نخبط فيه

باقوللك..الجهل نور..انت عمرك بصيتي في شيت المرتب

لا طبعا أعوذ بالله..بس باخد بالي ان عمود الاستحقاقات قصير..وعمود الاستقطاعات طوييييل

ياسلام علي قوة الملاحظة ..قريتي مرة ان آخر علاوة مضافة تاريخها يرجع لخمس سنين فاتوا

فتحت بقي وبلمت
يعني إيه

يعني العلاوة دي هتتضاف لجنابك بعد خمس سنين وعليكي خير

هاو كام

احنا غير موظفين الحكومة يا فالحة..علشان كدة هتاخدي السنة دي العلاوة اللي عليها الدور

ودي كام يعني

أكيد من أم خمستاشر في المية


ودة معناه إية جنابك

معناه إن الأساسي مش هيزيد تلاتين في المية يا هانم..معناه إن المرتب الشامل هيزيد شوية صغننة مش كتير

هو فيه فرق بأة بين الأساسي والشامل


طبعا..صباح الخير..موظفين الحكومة أساسيهم مش فارق عن شاملهم لأنهم قطاع خدمي مش بينتج..لكن احنا عندنا حوافز إنتاج..بس دة مش معناه إننا في يغمة..المعاناة واحدة وإن اختلفت درجاتها..واحنا لازم نستحمل..علشان أي حد يعيش..وبعدين هم هيجيبوا منين..علي رأي المثل..خد من دقنه وافتل له

مش مستريحة للكلام..اتجاهاتك مش ناقدة..أساسي إيه وشامل مين..أنا طموحاتي أكبر من كدة

أنا باكره طموحاتك..احنا دولة نايمة..نيمي طموحاتك بأة

انت معانا وللا مع الحكومة

أنا مكلوم وعندي منحة..بس منصاب في شعبي قصدي أسرتي

يعني الخلاصة..هنكمل في مشوار الشقة الجديدة وللا لأ

ماهو علشان كدة باصرخ واقول فوووقي فوقي فوقي..فرملي نفسك..اربطي الحزام..شديه كويس..احنا داخلين علي منعطف تاريخي

الراجل جاب مكتب الولاد وزرعه في الريسيبشن..وحط عليه شوية معالق خشب من بتوعي ووقف يخطب في واحدة منهم مكتوب عليها قناة البس هس بس

مراتي المسطولة..أبنائي المهابيل..بلاش هتاف..بلاش تصفيق
دعوني أعمل في صمت

الواد كوكو وقف وقال
المنحة يا بابا
عايز سكوتر جديد الصيف داخل


الراجل شاور للأمن يرموه برة وقال
انتم مش عارفين أنا باعمل إيه علشانكم..باصحي كل يوم خمسة الصبح يا كلاب..بطلت اسكواش علشان أوفر مش علشان الديسك..أنا باتابع كل حاجة وعارف مشاكلكم كلها..بس أعمل إية في أمكم..هي السبب جابت لي أرطة عيال ..ولد وبنت..حد يعمل كدة..احنا عندنا انفجار سكاني في الشقة..وكمان احنا خارجين من حرب تلاته وسبعين تعبانين

توتة بتسألني:هو احنا سنة كام يا ماما

بيشاور بصباعه عليها وبيقول
أنا عارف إن فيه قلة مندسة بتحاول تقلل من جهودنا..بس أنا أملي فيكم كبير..انسوا أحلامكم وتطلعاتكم..عيشوا ببساطة..وأوصيكم بشد الحزام..إيه يعني لو بطلنا نصيف ونتفسح ونتكلم في تليفونات ونجيب لبس وناكل تلاااات طقات بحالهم
إيه يعني لو الواد الصايع ابو سبع سنين دة اشتغل بدل صرمحته بالسكوترات
إيه يعني لو تعبتم كلكم شوية علشان أعيش أنا قصدي علشان ننفذ الخطة الخماسية الألف ويبقي شكلنا حلو قدام المجتمع الدولي قصدي الجيران

آي آي
إنت خنقتني

قصدي الحزام خانقني يابابا

أنا بأة..جه علي الدور لأدلي بدلوي
ياللا ياولاد
شيلوه علي الأعناق..فسحوه


‏

Labels: تأملات, شئون خاصة

Posted by بثينــــــة :: 10:49 PM :: 13 Comments:

Post a Comment

---------------------------------------

Wednesday, April 23, 2008

درس من داخل المقرر

أنا أم لا تؤمن بالدروس الخصوصية ‏..وفي ظل نظام تعليمي وارف ظليل كما تعلمون جميعا أحاول الاعتماد علي نفسي في تعليم أولادي
ولعام مضي كنت شايلة الليلة كلها وحدي..كتالوج..كل المواد لسبع مواسم متتالية بنجاح ساحق
وخاصة لأن المدرسين المبجلين من نظام :انظر الكتاب
ويقضون الوقت أثناء الحصص في الرد علي الميسدات أو تبادل البلوتوثات
كنت أؤدي المهمة جيدا
ولكن
وآه من لكن
لاحظت أن معدل أدائي في النازل وذلك لأن الموضوع كبر وتفحول مني وأصبح المفعوص الصغير مهددا بالضياع والتشرد بعد أن عبر مرحلة الكي جي دون أن أتمكن من محو أميته
وبعد مداولات ومشاورات تفضل السيد الفاضل زوجي العزيز بعرض تولي مسئولية مذاكرة 'بعض'المواد الدراسية للآنسة الصغيرة والتي ستنال لقب أفندي بعد ابتدائية هذا العام ‏

وعليه ‏
سيتم توافر وقت أطول لي لكي أتمكن من جعل الصغير قادر علي التفرقة بين الألف وكوز الذرة
وهكذا
لا أعلم عن الماثيماتيكس والدراسات الاجتماعية بتوعها حرفا هذا العام
وحدثت المفاجأة لسفره المفاجئ منذ أيام و الذي تزامن مع امتحانات التجربة
وقد عبرت مأزق الماث بحمد الله

وببركة دعاء الوالدين وبقايا من قواعد قديمة قابعة في غياهب الذاكرة
واليوم واجهني ‏‏'الهول‏'عارفين الهول
بتاع ياللهول دة
ووجدتني مضطرة لمذاكرة درس بعنوان
نظام الحكم في وطني مصر
وحقيقي ساعتها أحسست أني انضحك عليا وأبو العيال ساب لي مذاكرة الساينس البايخة واستأثر هو بالمقرر الكوميدي لوحده
ما سكتش علي فكرة وأرسلت اس ام اس كلها ملامة ورد علي بأغنية بلاش الملامة..واهنأي واسعدي بالكوميديا السيك في الدرس اللي يجنن

وطبعا أحب انكم تشاركوني لحظات السعادة ‏..هي ساعة الحظ بتتعوض
بداية الدرس
يابني..أنت تعلم أن وطننا العزيز مصر يتكون من ست وعشرون محافظة

‏'انظر الخريطة وحدد موقع محافظتك‏'‏
أسقط في يدي..مش بقوا تمانية وعشرين ياماما أول امبارح
آه يا توتة..بس دة لسة مش في المنهج
يعني مش حقيقي
لأ حقيقي بس مش في المقرر
يبقي دة السؤال اللي أكيد مش هييجي في الامتحان ياماما

هاعدي علي العناوين يا جماعة وركزوا معايا
اختصاصات المحافظ في المحافظة:أهمها ..التعاون مع أبناء المحافظة في إدارة محافظتهم

وش مسبهل

جمهورية مصر العربية دولة ديمقراطية لأنها تطبق النظام الديمقراطي

وش محلوق له

المقصود بكلمة ديمقراطية: أن يحكم الشعب نفسه بنفسه


وش كدة

ماذا تحقق الديمقراطية
تحقق المساواة والعدالة فالشعب هو من يختار رئيس الجمهورية عن طريق الانتخاب الحر المباشر

ثم يختار رئيس الحكومة التي تساعده في حكم البلاد

وش فاتح بقه

السلطات الثلاث
التنفيذية والتشريعية والقضائية
ولنبدأ بالتنفيذية والتي تتكون من
أولا : الحكومة واختصاصاتها ورص كل الوزارات

ثانيا :الدستور
تعريف الدستور
عارفاه يا ماما من فيلم عايز حقي
لا لا لا ركزي معايا
سيبك من التعريف وقولي ورايا
نص الدستور المصري الصادر سنة واحد وسبعين علي
جميع المواطنين متساوون في الحقوق والواجبات

وش مضروب علي قفاه

نظام الحكم في مصر نظام جمهوري
لكل إنسان حرية التعبير عن رأيه

وش مكمم

الدفاع عن الوطن واجب مقدس

وش بيحيي العلم

ثالثا:رئيس الجمهورية
طريقة اختيار رئيس الجمهورية: لكي يكون للشعب الكلمة الأولي في اختيار من يريده تم تعديل طريقة اختيار الرئيس لتكون عن طريق الانتخاب الحر المباشر ويسمح لأكثر من مرشح بالترشيح لرئاسة الجمهورية ليختار الشعب من يريد بإرادته الحرة
مدة الرئاسة ست سنوات

وش بيقول نعم نعم

حاجات بأة تانية عن السلطة التشريعية والقضائية

مش قادرة اكتب كل التفاصيل سامحوني
ضحكت من قلبي
وخاصة بعد ذلك السؤال في سلاح التلميذ
السؤال التاسع: اذكر من هو

القائد الأعلي للقوات المسلحة
رئيس الجمهورية يا ماما

يعين رئيس الوزراء والوزراء والمحافظين وكبار رجال الدولة
الرئيس يا ماما

يقوم بوضع السياسة العامة للدولة
الريس يا ماما


يقوم بتمثيل مصر في الخارج
المنتخب يا ماما
غلط غلط
الريس يا ماما

يقوم بعقد المعاهدات وإعلان الحرب
المعلم رشدان
غلط غلط
خلاص يبقي الريس يا ماما


السؤال العاشر:‏ أذكر 'عملين‏' من الأعمال التي تقوم بها الحكومة المصرية

السؤال الحداشر: اختر الإجابة الصحيحة من بين 'الأكواس'
تتم 'محاسبة' الوزراء من خلال
‏(رئيس الجمهورية-مجلس الشعب-الدستور) بس
مش قادرة
هاموت
هافطس
عايزة عشرة جدعان يقوموني بعد ما استلقيت علي قفايا من الضحك

البنت قالت لي يا ماما مش هتذاكري لي دراسات تاني
انتي اللي زيك مش لازم يعيش ليوم التلات..ولا الأربع
بتضحكي
بعد ما الحكومة حرمت نفسها من العيش عشان تستعشي
ومن الغطا عشان تستغطي
دي بنتي والله بس الظاهر عايزة تشتغل في حديد عز

بافكر اقفل التعليقات عالبوست دة 'رغبتن' في الحفاظ عليكم دي عشرة برضة وأنا بنت حلال بس حسيت اني كدة مش هابقي ديمقراطية

وأنا ديمقراطية بنت ديقراطي أحيا في بلد ديمقراطي
طاطي طاطي

Labels: تأملات, شئون خاصة

Posted by بثينــــــة :: 9:00 PM :: 18 Comments:

Post a Comment

---------------------------------------

Monday, April 21, 2008

أسئلة صعبه

يا حضرات الناس المحترمين
يا حضرات السادة والسيدات والولاد والبنات الحلوين والحلوات
ماذا أقول
ماذا أقول بعد كل ما قيل
لقد جف حلقي وتصلب لساني ونشف ريقي
مش باحب التااااااج
ولست وحدي التي تكره أن تجلس بمقعد المتهم لتجيب وتجيب وتجيب
وعندما قال مفيد الله يسااااامحه لك تاج اجباري
تخيلته علي طول جالس وراء مكتب وفاكك الكرافات نص فاكة ومشمر ومسلط فوق دماغي مصباح كهروبائي متأرجح وعمال يقول:
سين..ما قولك فيما هو منسوب إليك ترااااخ
وبما إن مفيد أخ عزيز قرأت البوست بتاعه بإمعان لأجد أن التاج المشار إليه هو إني أنا من سيسأل عشرة أسئلة صعبة
وهنا أدرك بثينة الصياح وقلت بعربية فصيحة : أو كيه

واحد : يعني إيه كلمة وطن..هوأهلك هو حبك ذكرياتك هو حالة م الشجن ..وللا مغص كلوي في جسد إنسانيتك يوقظك من عز أحلامك ويلقي بك علي رصيف الحاجة والحقد والغل المجتمعي المحلي علي كل من له قدرة سحقك وحقد وغل عالمي انترناشيونال يتبعثر بمنتهي العدل علي سكان البسيطة..والكبيسة

اتنين : مين هو العيفريت ابن العفاريت اللي اخترع الفيس بوك اللي لم الشامي ع المغربي وجعله مسرح سياسي كبير..ياللهول
وربما كان له أغراض أخري لكنها لم تزعج أولي الأمر فينا لأنها لم تقض مضاجعهم مثلما فعل التجمع السياسي الأخير الذي قاد إلي الإضراب الشهير
ملحق للسؤال..مين هو العبيط ابن العبيط اللي نزل بالترجمة ولا كأنه نازل بورق حائط: الفيس بوك أو كتاب الوجه


تلاتة ‏:‏ كيف بالله عليكم أحيا شهرا بحاله ومحتاله بدون فتوي جديدة مستفزة للنهايات العصبية لخلاياي المخية
ماليش دعوة
عايزة الجرعة بتاعتي ‏

أربعة : كيف يمكن أن نسمح كمجتمع إنساني بوجود مواطن يصرخ محتجا علي إحدي الشاشات بأنه لا يستطيع شراء ما يسمي بهياكل الفراخ -العظام المتخلفة عند الفرارجية المنقرضين- نظرا لإرتفاع ثمنها ووصول سعر الكيلو لسبعة جنيهات
تعقيب علي السؤال..يخرب بيت كدة

خمسة : مارأيكم في تحويل مسار حياتي العملية لإخراج فيلما تسجيليا خلفيته الموسيقية أغنية الحياة بأة لونها بمبي..ويؤرخ للحقبة الحياتية الحالية ..مشاهد لولاد وبنات زي الفل بيقولوا:أنا باشتغل في حديد عز وكاميرتي تدور في الشوارع لنلمح أفيش فيلم ورقة بفرة وملمح للنصب التذكاري الجديد الذي سيساهم الشعب كله في بنائه والذي لن يكون مقصلة أو مشنقة بل هو تلك الأداة التي ستقضي علي المشاغبين الزاعقين تماما كما تم القضاء علي سليمان الحلبي


ستة : فين رضا هلال
عادة ما أنسي ولكني لا أنسي حاجة ضاعت مني
وأظل في حالة تذكر دائم لها
وهذا الرجل بالذات لم أقرأ له كثيرا
لكنه ضاع واختفي وتبخر
وكل فترة أتساءل خلاص كدة
كأنه ساعة وقعت في اتوبيس
ماحدش فاكر حتي يتساءل ويتعجب

سبعة : متي يختفي من مجتمعنا الراجل الدجال الذي يذهب له ذوي العلم وينصاعون لأوامره ونواهيه
سؤال غبي يمكن لأنه متعلق بثقافة مجتمع بأكمله لكنه بجد يؤرقني

تمانية : هل أنا مدمنة
للإنترنت والقهوة والوحدة والكتابة والقراءة والدستور والإنتقاد ومني الشاذلي
ملحق للسؤال.. هل أحاول طلب العلاج

تسعة : ما هو التشخيص النفسي لحالة مرتضي منصور
دة سؤال بجد لأني احترت في تفسير تصرفات الرجل فعلا واحترت في حتي مجرد تصنيفه
هو حلو وللا وحش
بجد

عشرة : امتي بأة..امتي

‏*‏****
وهكذا
ورغم اني مازال في دماغي ييجي سبعميت سؤال لكن سأكتفي بهذا القدر
وشكرا لمفيد الذي جعلني أتبحبح
سلامو عليكم

Posted by بثينــــــة :: 10:00 AM :: 20 Comments:

Post a Comment

---------------------------------------