آخر كام يوم

التلاتة وعشرين .. والأخيرة
-----
هي الكبيرة : أنا كنت سعيدة أوي لما السنة دي استعدينا لرمضان كويس
هو الكبير : أفهم من كدة إننا ممكن ناكل خشاف لسة
هي الكبيرة : هاهاها أنا قصدي روحانيا .. حاسس إنك راضي عن أدائك
هي الصغيرة : هو لما غير خطة اللعب و نزل بجلبرتو بأة أحسن
الجمهور : هاهاهاها
هو الكبير : الحمد لله .. كان نفسي أبقي أحسن شوية كمان .. بس كان لازم أشوف شوية حاجات كلوا من وقتي
هي الصغيرة : ما عندناش مانع من كام مسلسل .. المهم إنك نسيت شوبير اللي برامجه كلوا دماغي
هو الكبير : الحمد لله علي أدائي .. ورمضان لسة فيه شوية .. تفتكري أعتكف آخر كام يوم
هو الصغير : مادام فيه وقت ممكن تلحق يابابا .. الماتش شغال .. والمهم الكورة مع مين
هي الصغيرة : طبعا وحتما ولزما الكورة مع دريم
الجمهور : هاهاهاها
هي الكبيرة : بس يا أولاد .. ربنا يقدرك يا توتي .. إنت مجتهد .. بس هو التوفيق وعدم التوفيق
الجمهور : هاهاهاها
هو الكبير : حتي أنتي يا بروتسة .. يارب ألحق آخر أيام رمضان
هي الكبيرة : فينك يا تيتة وحشتينا .. عارف كانت هتقوللك إية .. جيت أبيع الحنة كترت الأحزان .. جيت أعمل مسحراتي لقيته خلص رمضان

‏*‏**
التترات
البطولة الخارقة : هو الكبير
:D
البطولة المطلقة .. بتسكين الطاء : هي الكبيرة
:D
النجم الكوميدي قنبلة الموسم : هو الصغير
:D
النجمة الفتانة .. عفوا .. الفاتنة : هي الصغيرة
:D
بالإشتراك مع النجمة القديرة

تيييتة

كل سنة وأنتم طيبين

الكحكة لا تزال في صاجي

الاتنين وعشرين
-----
هي الكبيرة : إية اللي في جيبك دة
هي الصغيرة : دة .. دة .. زلط
هي الكبيرة : وليه في جيبك زلط .. هو هبل
هي الصغيرة : أبدا .. سمعتك بتقولي هتعملي كحك السنة دي فقلت أتدرب علي القرقشة
الجمهور : هاهاهاها
هي الكبيرة : الحق عليا .. دا أنا باسهر علشان أعمل لكم الكحك وأعيشكم في مود تراثي رائع .. فين أيام زمان والعيلة كلها بتعجن وتلت
هي الصغيرة : ما هم الناس بيلتوا ويعجنوا برضة بس في سيرة بعض .. عارفة لو تيتة هنا كانت قالت إية .. شرا العبد ولا تربيته .. هاهاها
هي الكبيرة : لا يا دقرمة .. كانت هتقول آخر خدمة الغز علقة .. سديتوا نفسي
هو الصغير : إزيكم يا بشر
هي الكبيرة : إية صوت الشخللة دي
هو الصغير : دة .. دة .. طوب
هي الكبيرة : بس .. مش عايزة أسمع
هو الكبير 'داخل شايل حجر جرانيت بتاع خمسين كيلو' : أنا قلت أتدرب علي شيل علب الكحك اللي هنوزعها علي المنكوبين .. من الجيران والقرايب والحبايب .. كل سنة وأنت طيبة
هي الكبيرة : لأااااااا

الراجل دة هيجنني

الواحد و عشرين
-----
هي الكبيرة : علي فكرة بأة صباح كان عندها حق
هو الكبير : إنها اتجوزت للمرة السبعتاشر يعني
هي الكبيرة : لا يا توتي ربنا يخليك لي
الجمهور : ووووو
هو الكبير : عندها حق في إية .. دة أنا باتأزم لما باشوفها دلوقتي .. أنا باقول بأة أن عبد الوهاب هو اللي عنده حق .. أنا والعذاب وهواك عايشين لبعضينا
الجمهور : ييييي
هي الكبيرة : لا بجد .. صباح قالت رمضان ماعمروش قال كدة .. وفعلا .. مين قال اننا في أيام الصيام استهلاكنا يزيد وياريت بناكل بجد .. بس لازم تسعين صنف كل يوم وخلاص .. أنا باقضي اليوم كله في المطبخ .. حرام
هو الكبير : طيب هنفطر إية النهاردة
هي الكبيرة : بريك بأة .. أنا أوف النهاردة
هو الكبير : والسمك البوري اللي أنا جايبه راح فين والشوربة فين هي .. هاهاها
هي الكبيرة : أنا مش هاقوللك الصومال ولا النيجر .. افتكر كدة اخواننا في العشوائيات وبالراحة شوية
هو الصغير 'من بعيد' : يعني هتنبسطوا لما يجيلي هزال .. أنا بالعب كونكت فور ومحتاج آكل كويس
الجمهور : هاهاهاها
هي الكبيرة 'وهي بتدور علي حل' : مش ملاحظ إن ماحدش من العيلتين عزمونا السنة دي .. هو فيه إية
هو الكبير : ما إحنا برضة مطنشين .. بصراحة باحب أأنتخ بعد الفطار ومافيش نفس للمجاملات
هي الكبيرة ' بتعافر' : طيب اعزمنا برة النهاردة .. بليييز
هو الكبير : لازم نحجز قبلها ما إنتي عارفة رمضان والزحمة
هي الكبيرة 'استسلمت' : طيب اعمل أنت السلطة
هو الكبير 'بيحط صباع ملفوف ببلاستر في عينيها' : متعور
هي الكبيرة : طيب هاقوم علي المطبخ .. مش عايز تعرف المنيو يا توتي .. هاعملك كذا صنف .. منيو مخصوص ليك
هو الكبير 'منجعصا' : اشجيني
هي الكبيرة 'بدلال' : بصارة .. وفولية .. وبرام فول بالبصل .. وطاجن فول بالسجق .. والشوربة بأة .. عدس
هو الصغير 'ينهق من بعيد' : آلو المطافي .. هنستناكو بعد الفطار .. انفجار أمعاء أسرة مكونة من خمس أفراد
الجمهور : هاهاهاها


تيتة 'وهي بتلم هدومها' : أربعة بس يا خويا .. وأنا هاقعد لما أنهق .. صحيح العند يورث الكفر .. بس علي إية .. العبد وسيده علي الله
الجمهور : تيتة تيتة

كومبو

العشرين
-----
هو الصغير : أخبار لبس المدرسة إية .. إية نظامكم معايا السنة دي
هي الكبيرة : لك عين تسأل بعد ما بهدلت السنة اللي فاتت لبس كان مفروض يكفيك سنتين
تيتة' وهي بتعمل ضوافرها بالمبرد' : منين تجيلك الريحة الحلوة يا مشئوم .. وأمك البصل وأبوك التوم
هو الصغير 'مطنشا' : أهم حاجة عندي الكرافتة والتريننج سوت وكوتشي محترم وإذن من المديرة بإني ماألبسش اليونيفورم لو حبيت .. آه .. وكمان عايز بلوفر مش سويتر علشان أعرف أربطه علي وسطي .. والشنطة فيها سبع جيوب وزمزمية مش صناعة صيني .. واستنضفوا الأقلام .. من الآخر .. أنا طلبي كومبو
الجمهور : هاهاهاها

طنط نسبية

التسعتاشر
-----
هو الصغير : بابا .. هو احنا فقرا وللا أغنيا
هو الكبير : يا حبيبي .. الفقر
هو الصغير : .. والغني دة شئ نسبي .. أنا عارف هتقول كدة .. وأنا مش فاهم يعني إية نسبي أصلا
هو الكبير ' وقد تقعر صوته' : يعني إنت فقير أو غني بقدر احتياجاتك اللي عايزها وعارف تعملها .. ممكن يبقي فيه واحد مش عايز غير حاجات بسيطة من الدنيا وبيعرف يحققها علشان كدة بيحس إنه غني .. لأنك ممكن تلاقي عنده فائض يديه للناس
هو الصغير : يعني هو بالنسبة لنفسه غني بس بالنسبة للي حواليه جربوع
الجمهور : هاهاهاها
هو الصغير 'بيكلم نفسه' : بس برضه ممكن يعتبر غني لأنه بيبقشش علي الناس ولو منظر يعني
هو الكبير : وممكن تلاقي واحد عنده حاجات كتير بس حاسس انه لسة ماعملش كل اللي هو عايزه .. و
هو الصغير : ويبقي الناس شايفينه غني بس هو حاسس إنه فقران وجربوع برضه
و'يوشوش نفسه' : بس هو أكيد بيبان أنه غني لأنه فعلا غني .. إية دة
هو الصغير : يعني طنط نسبية دي لها أوقات بأة
هو الكبير : أيوة .. 'موشوشا' بتطلع فجأة كدة زي مامتك
الجمهور : هاهاهاها
هو الصغير : بس اللخبطة دي ما تمنعش ان فيه حد فقير وهو فعلا فقير كحيت وحد غني وهو فعلا غني فلة
هو الكبير : صح تمام
هو الصغير : طيب لو أنا حبيت أجيب موتوسيكل واحنا نعرف نجيبه يبقي احنا اغنيا .. صح .. بالنسبة لنفسنا وللناس لأن الموتوسيكل دة حاجة كبيرة
هو الكبير 'زاغرا' : فيه فرق بين عارفين نجيب و عايزين نجيب
هو الصغير 'تاني' : بابا .. طيب لو أنا باجيب درجات معقولة وحاسس اني شاطر أبقي طبعا شاطر مش مهم الترتيب في الفصل
هو الكبير : هنا بأة تطلع طنطك نسبية لأن تفوقك بيفضل مقارن باللي حواليك ولغاية لو ربنا كرمك وعديت فوق حدود التفوق المعروف ودة ما أظنوش هيحصل يعني .. نتيجة لعوامل وراثية أنا عارف مصدرها


هو الصغير : بس إنت ما جاوبتنيش احنا اغنيا وللا فقرا
هو الكبير : إنت شايف إية
هي الكبيرة ' تدخل في حركة كاراتية صارخة' : بتعملوا إية هااا
هو الكبير : بنتكلم عن نظرية النسبية .. موضوع شيق جدا
هو الصغير'وهو سايبهم وماشي' : آه .. أنا كنت باقول إن نانسي بالنسبة لهيفا أعيل .. وبابا كان بيقول إن ميريام بالنسبة لهيفا أروش .. بس لسة كان بيقول ماما بالنسبة لإليسا .. إية ‏.. مش فاكر
هو الكبير 'يصد الهجوم محافظا علي نظارته بإيديه' : آه يا مفتري .. ضيعتني .. ضيعتني
الجمهور : هاهاهاها

تيتة : هيهيهي .. صحيح علي رأي المثل .. رايحين تبرموا علي مين دا إحنا كلنا برامين .. هيهيهي

تفكير علمي

التمنتاشر
-----
في بداية مرحلة جديدة بدأت 'هي الصغيرة' في دراسة الهندسة .. فاكرين النظريات .. بما أن .. إذن
وبعد تصفح سريع معها في كتابها الجديد .. 'عجبها النظام' .. وبدأنا في المعاناة من لحظات تطبيقية غبية لنظام التفكير العلمي السليم
‏*‏**
هي الصغيرة : ليه دخلتي علمي يا ماما
هي الكبيرة : علشان ما كانش ينفع أدخل أدبي
هي الصغيرة : طيب ليه دخلتي طب
هي الكبيرة : علشان ماكانش ينفع أدخل آداب
هي الصغيرة : وليه اشتغلتي
هي الكبيرة : علشان ما كانش ينفع أقعد في البيت
هي الصغيرة : دايما يعني كان فيه اختيار تاني ماعرفتيش تعمليه .. ليه يا ماما ماكنتيش بتحاولي تعمليه .. لا لا زعلتيني .. طيب تحبي بأة أقوللك ليه اتجوزتي بابا
هي الكبيرة 'ساهمة في مسألة الإختيار التاني' : ليه
هي الصغيرة : علشان معرفتيش تتجوزي واحد تاني كنت عايزة تتجوزيه
تيتة ' وهي بتحط مانيكير' : احنا كدة ياستات .. عيننا فيه .. كخ عليه
الجمهور : ووووو
هي الكبيرة ' تأخذ وضع الجزار وسيف إيدها علي رقبة المفعوصة ' : قبل ما البيت دة يتقفل علي إيدك .. حلال الله أكبر
الجمهور : حرام حرام كفاية

سي تامر

السبعتاشر
-----
هي الصغيرة : ياريتك كنتي دخلتي معانا ومع جدو فيلم تامر الجديد .. جميل أوي
هي الكبيرة : الأغنية بتاعة الفيلم ظريفة ولو إني مش باطيق سي تامر دة
هو الصغير : ولا أنا .. أنا مش بحب سي تامر دة ولو إن أصحابي بيقولوا أني شبهه
هي الصغيرة : كل الولاد مش بيحبوه .. بس كويس بأة انك ماجيتيش .. لو تعرفي كان بيشاور علي إية وهو بيغني : أجمل حاجة بحبها فيكي هو دة (...) وهي دي (...) كنت خليتينا نخرج من الفيلم
هي الكبيرة 'صامتة وفي سرها' : أحسن حاجة أعمل نفسي مش سامعة
هي الصغيرة : فيلم دبور بأة ...ه
هو الصغير : في أجازة العيد .. ماشي
هي الكبيرة 'تصرخ' : ولا كلمة ولا حرف ولا نفس .. كفاية جدا انكم شفتوا الإعلان

تيتة 'وهي بتفك الرولو من شعرها' : اكسري للبنت ضلع يطلعلها اتنين .. علي رأي المثل .. أول الرقص حنجلة
هو الصغير : حاضر حاضر .. ناوليني قفصك الصدري يا بنتي .. ما أنا أصلي فاضي لكم بأة .. كل مطرب جديد بضلع .. قفصها هيخلص كدة
الجمهور : هاهاهاها

بلد البدع

الستاشر
-----
هو الكبير : تعرفي إني محتار جدا السنة دي .. أعمل إية في فلوس الزكاة
هي الكبيرة : هنطلعها زي كل سنة عادي
هو الكبير : بس من كام سنة طلعت موضة الشنط .. نعمل يعني شنط مواد غذائية متكاملة .. محمود صاحبي عمال يزن عليا
هي الكبيرة : ما أنت مارضيتش تعمل كدة السنة اللي فاتت
هو الكبير : طبعا .. ماهو صعب حد يروح لدكتور مثلا ويدفع له الفيزيتة شوال رز
هي الصغيرة : احترس من فضلك .. أنت ترجع إلي الخلف .. مش هي دي المقايضة يا بابا
هو الصغير : أنا باعمل مقايضة بكروت لعبة يوجي علي فكرة .. مش حرام أنا سألت
هي الكبيرة : أنا شايفة نفضل زي ما احنا وبلاش بدع بأة

تيتة 'من بعيد وهي بتنكش شعرها الكيرلي' : لا تسمع محمود الأقرع ولاتاخد منه نصيحة .. لو كان ربنا بيحبه كان ساب له راسه صحيحة
الجمهور : هاهاهاها

هم و هن

الخمستاشر
-----
هو الكبير : حد يقوم يشغل التليفزيون
هو الصغير : حد يرد علي التليفون
هو الكبير : حد يناولني الشاي
هو الصغير : حد يوطي التكييف
هو الكبير : حد يناولني الريموت ياجماعة مش كدة
هي الكبيرة ل 'هو الكبير' : مش عايز حد يطرقعلك .. صوابعك
الجمهور : هاهاهاها
هي الصغيرة ل 'هو الصغير' : قوم اتحرك .. ماما هي اللي دلعتك
هي الكبيرة : أنا دلعتك زيه بالضبط .. بلاش ظلم
هي الصغيرة : يا ماما دة السندريللا الله يرحمها قالت البنت زي الولد .. انت بحنيتك بوظتي الولاد هنا
هي الكبيرة : البنت لما تعمل حاجات في البيت بتبقي مبسوطة .. العطاء إحساس جميل يا بنوتتي
هي الصغيرة : أنا إحساسي مهنج من كتر الشغل .. ياليتني كنت ولدا
هي الكبيرة : عايزة إية يعني
هي الصغيرة 'وهي بتعيط' : عايزة أشوف فيلم المتحولون
الجمهور : هاهاهاها
هي الكبيرة : ضعيفة وطرية .. اجمدي كدة .. ما احنا في الهوا سوا .. سيه لا في يا توتة
هي الصغيرة : ما هو لو جيلكم كان جامد ومتين وعرف يقف وقفة .. وقفة .. ستات .. ماكانش ضهري وجعني وأنا في عريان الشباب
الجمهور : هاهاهاها
هي الكبيرة : ريعان ريعان يا فالحة .. سايبين لكم الطلعة دي .. ما أنتم جيل ال ال ال مستقبل .. 'وهي بتتلفت حواليها' عادي يعني مش قصدي حاجة
الجمهور : هاهاهاها
تيتة 'وهي بتكوي هدوم هو وهو' : صومعة بتعاير بنية .. قالت لها ماحنا الاتنين من الطوف يا مرزية
الجمهور : هاهاهاها

فتاوي مانجة

الأربعتاشر
-----
هو الكبير : أخبارك إية .. تمام
هي الكبيرة : الحمد لله
هو الكبير : بس سيبك إنتي بتيجي علي الصيام .. محلوية كدة .. إنتي لو تصومي بتاع سبعتاشر سنة كدة تبقي ولا ناهد شريف
هي الكبيرة : أصوم سبعتاشر سنة .. ميرسي يا كوهين .. قصدي يا حبيبي .. بس اشمعنا ناهد شريف يعني
هو الكبير : دي ياستي النموذج الأصلي لل اسمه إية قبل ما ييجي اليوم اللي كله بأة مضروب مش أصلي إشي تكبير اسمه إية وتصغير اسمه إية وشد اسمه إية وجذب اسمه إية وتلوين اسمهم إية وصبغ اسمه إية .. استغفر الله العظيم الواحد مش عارف يتكلم حتي .. ما تنعكشي كدة علي النت في فتاوي جمال البنا بيقول إية بخصوص نهار رمضان
الجمهور : ووووو

انهيااااار

التلاتاشر
-----
هو الكبير : سمعتي عن اللي حصل لمحمود
هي الكبيرة : خير .. اتجوز تالت
الجمهور : هاهاهاها
هو الكبير : أعوذ بالله منك يا شيخة .. دة مراته سامحته بعد ما طلق المزة يوووه قصدي سعاد حسني يوووه قصدي الزوجة التانية .. تقومي إنت تفضلي فاكرة كدة وتحطيه في البلاك ليست
هي الكبيرة : إعرف صاحبك 'وتغمز بعينها'وعلم عليه
هو الكبير : يا شيخة دة غلبان .. خسر في حركة البورصة من أسبوعين حوالي ربع مليون جنيه
هي الكبيرة : إنها عدالة السماء نزلت علي أم رأسه .. وكان عامل فيها الخبير الاقتصادي وعايز يجر رجلك
هو الكبير ' مذعورا' : وهو كان هيعمل إية .. طيب قوليلي إنت هنعمل إية في الجمعية اللي قبضناها من كام يوم
هي الصغيرة : أنا أعرف مزة جنااااان
الجمهور : هاهاهاها
هي الكبيرة : نحطهم في البنك
هو الكبير : إنت عارفة الفوائد اتدحدرت إزاي .. دة غير القلق بأة .. البنوك بقت زي معارض السيارات .. كتير .. ومشكوك فيها
هي الكبيرة : طيب نشتري شقة وأهي تنفع الأولاد
هو الكبير : احنا ضامنين .. مش يمكن تحصل في الأمور أمور وينهار سوق العقارات .. ثم الفلوس دي يادوبك تنفع مقدم لشقة تلاتة أربعة متر مربع
هي الصغيرة : ممكن ناخد اتنين متر مربع في أي بلد مستقر .. دارفور مثلا
الجمهور : هاهاهاها
هي الكبيرة : طيب .. نجيب دهب
هو الكبير : ما إنت اللي قلتي إن الجرام نزل أربعين جنيه مرة واحدة من كام يوم
هي الكبيرة : غلبتني .. نجيب بأة حمام ونطيره
هو الكبير : لا ما أنا قلت الحمام يبقي مجازفة هاهاها فمجازفة بمجازفة بأة أعمل زي محمود .. المنطق بيقول بعد الهبوط صعود .. و ياصابت يا خابت
هي الكبيرة : قلبي قلبي

تيتة من بعيد وهي بتلعب أيروبكس : يا خويا .. جيب السبع ما يخلاش هيهيهي

العاشرة مساءا

الإتناشر
-----
هي الكبيرة : تصدق إن مني الشاذلي وحشتني
هو الكبير : اتلم تنتون علي تنتن
الجمهور : هاهاهاها
هو الكبير 'تاني' : دة أنا باسجد لربنا شكرا لأني مش مركز في حاجة غير رمضان ومحاولات الاستغفار .. معرفش مين يتقبض عليه .. معرفش مين يهرب قبل الحكم عليه .. إنهيار معرفش إية .. حريق معرفش فين .. غرق معرفش إية .. كل دة بيحصل في هدوووء جميل من غيرما أحس .. شكة دبوس .. ستات ندابات ملاحيس
هي الكبيرة : آه يا شعب مغيب وعايز يتغيب
هو الكبير : بتقولي حاجة
هي الكبيرة : آه .. باقول بمناسبة الستات .. هاعمللك أم مني بالمكسرات
هو الكبير : ما فيش صنف تاني
هي الكبيرة : أيوة .. صوابع مني
الجمهور : هاهاهاها
تيتة 'وهي بتهدي النفوس' : دي يتقال لها .. صرصار وعشق خنفسة دار بيها في البلد محتار
الجمهور : وووووو

البايرة

الحداشر
-‏----
هو الصغير : أنا تعبت هنوصل إمتي
هو الكبير : خلاص .. مادام عدينا النفق يبقي هانت
هي الكبيرة : مش ملاحظ الفرق بين طريق مصر السويس .. والطريق بعد النفق .. الأرض في سيناء خصبة أوي
هو الكبير : مشاريع زمااان .. ترعة السلام
هي الكبيرة : والصالحية
هو الكبير : والعامرية
هي الكبيرة : عمي الله يرحمه كان عنده أرض في العامرية دي .. بس بارت
هو الصغير : بارت زي طنط سحر صاحبتك
الجمهور : هاهاهاها
هي الكبيرة : طنط سحر إنسانة محظوظة .. بلا وجع دماغ .. إلا هو إنت سمعت عن حد في معارف معارف معارف معارفك بيشتغل في توشكي
هو الكبير 'يبتسم' : لأ
هي الصغيرة : أنا عارفة ليه .. تلاقي مامة صاحب المشروع دة كانت بتقول له وهو نازل الصبح : روح يابني .. إلهي يجعل الخضرا في إيدك ناشفة
تيتة 'وهي تتصفح رواية شئ من الخوف بعدسة مكبرة' : اتوصوا بينا يااللي حكمتونا احنا العبيد وانتو اشتريتونا
الجمهور : باااطل باااطل هاه هاه هاهاهاه

سؤال

العاشر
-----
هي الصغيرة : بابا .. فاكر مسرحية الزعيم
هو الكبير : أيوة يا حبيبتي
هي الصغيرة : هو مش الزعيم مات في أولها كدة
هو الكبير'متلفتا حوله وهامسا' : مش فاكر يا حبيبتي
هي الصغيرة : دة هي دي فكرة المسرحية .. علشان كدة جابوا له بديل
هو الكبير 'متذكرا وهامسا برضه' : أيوة .. مات
هي الصغيرة : يعني دة بيحصل يعني .. كنت باتأكد بس

تيتة من بعيد ' وهي بتسمع ال إم بي ثري' : اللي عاجبه الكحل يتكحل واللي مش عاجبه من البلد يرحل

الحياة صراع

التاسع
-----
هو الصغير'في ساعة صيام' : تعرف يا بابا إن الدنيا دي كلها صراعات
هو الكبير : يا حبيبي أنا وماما بنختلف ساعات بس دي مناقشات مش صراعات
هو الصغير : أنا عارف طبعا .. هيدي مناغشة مناغشة زي ما تيتة بتقول
هو الكبير : تيتة بتقول أحلي كلام
هو الصغير : أيوة .. دايما تقول في الأوقات دي : اتلم الفار علي العرسة بعد الهتيكة والجرسة
الجمهور : هاهاهاها
هو الكبير'فاغرا فاهه' : ما علينا .. قصدك اية يا بني الصغير بالصراعات
هو الصغير : قصدي إن الدنيا منافسة .. أهلي وزمالك مثلا
هو الكبير : غلط .. غلط .. الزمالك مش بينافس الأهلي .. دي مغالطة تاريخية
هو الصغير : هو دة قصدي .. إن الأهلي اخترع منافس علشان يسخن الدنيا
الجمهور الأهلاوي : وووووو
هو الكبير : ابني حبيبي
هو الصغير ' والصيام مأثر جامد عليه' : أنا بس اللي مجنني ومطير النوم من عيني .. مين فيهم طعمه أحلي .. ومين اللي جه منهم في الدنيا دي الأول .. وياتري هو اخترع التاني علشان ينافسه وللا التاني دة منافس حقيقي
هو الكبير : إنت بتتكلم عن مين
هو الصغير 'حالما هائما' : البيبسي والكوكاكولا طبعا
الجمهور : هاهاهاها

وا بكيناه

التامن
-----
هو الكبير : ليه بطلتوا تدريبات السباحة .. أنا كنت متعشم فيكم تاخدوا بطولات
هي الصغيرة : دة علي أساس إننا هنبقي فلتة من التمانين مليون .. بأمارة بكين
هو الصغير : بكين كتير وماحدش مسح دمعتي .. أنا مش عارفني
الجمهور : هاهاهاها
هي الكبيرة : بس ناس راحت وكلفت نفسها .. بيقوللك مائة إداري وسبعة وسبعين لعيب
هو الكبير : فكروني بالريحاني .. حبل لزوم الخروف
هو الصغير : طيب عايزني ألعب سباحة وابقي أنا الخروف
الجمهور : هاهاهاها

تيتة ' وهي تلعب بالبلاي ستيشن' : يا خويا خلينا في بلدنا بلا قلة قيمة .. دة الأعور وسط العمي سلطان

خيبة رمضانية

السابع
-----
هو الصغير : بابا احنا عايزين نروح خيبة
هو الكبير 'وهو فارد الفلوس وليست الطلبات والكالكيولاتور' : ما احنا فعلا في خيبة كبيرة
الجمهور : هاهاهاها
هو الصغير : يا بابا أنا قصدي خيبة رمضانية
هو الكبير : حراااام تقول كدة
هو الصغير : بابا .. انا قصدي نروح البتاعة الكبيرة اللي فيها مطربين وشيشة وناس كتير ورقاصة
هو الكبير : فين دي يا حبيب بابا
هي الكبيرة : إزيك .. ليالي رمضان للتعبد وقراءة القرآن .. أنا مش فاهمة إية علاقة رمضان بالخيام ! هو الإسلام يعني خيمة وناقة .. طيب ماشي .. هاوافق .. أهو تاريخ .. إية دخل الرقاصة
هي الصغيرة : دي جغرافيا .. فصل التضاريس يا أمي
الجمهور : هاهاهاها
هو الكبير : حراااام .. 'ثم يوشوش هو الصغير' : خليها بعد رمضان يا حبيبي
ونظرة منه للأرقام خلته يقول : لأاااة .. ولا بعد رمضان .. انسوا الفسح .. تقشف حاد .. كافيهات إية ونوادي إية اللي كباية الشاي فيها بعشرين جنيه .. انسوا
تيتة ' وهي بتعمل داونلود لكليب روبي' : يابني سيبهم يطلبوا الصيت ولا الغني هو الكلام بفلوس صدق اللي قال البطيخة القرعة لبها كتير
هي الصغيرة : يا بابا خليك لارج
هو الكبير 'موشوشا' : كفاية مامتك سبعة إكس لارج
الجمهور : هاهاهاها

ر ز ل .. س م ج

السادس
------
هي الكبيرة : أخدت بالك من نمر العربيات الجديدة .. أرقام وحروف .. دي بيطبقوها مع تجديد التراخيص مش كدة
هو الكبير : أيوة .. دة بيديلهم كمية تباديل وتوافيق فظيعة .. دة سيستم معمول به في العالم كله .. زي الرقم القومي كدة .. بس لو استعملناهم صح
هي الكبيرة : ما بخافش غير من كلمة سيستم دي
هي الصغيرة : أنا كمان باخاف لما تقولي لي ساستمي أوضتك
الجمهور : هاهاهاها
هو الكبير : بس ليه بتسألي احنا لسة قدامنا سنة علي تجديد الرخصة
هي الكبيرة ' وهي جعانة أوي وعطشانة أوي أوي' : ممكن طيب نختار الحروف اللي احنا عايزينها .. اية رأيك في ب ل ح
أو ت ي ن
أو م و ز
أو ع ن ب
أو خ و خ بحبه أوي
هو الكبير 'وهو بيعمل السلطة' : وليه ما تكونش م ر ق
أو ج ز ر
أو ل ح م
أو ش ا ي
هي الصغيرة : وليه مايكونش ر و ج
أو ك ح ل
أو ب ح ب
هو الكبير : لا وحياة باباكي دة ممكن يكون د ب ح
أو و أ د
أو ل ط ش
هي الكبيرة : ياسلام بأة لو حد ييجي حظه في ن د ل
أو ب أ ف
أو ل ط خ
الجمهور : هاهاهاها
تيتة ' وهي بتلعب سودوكو' : صحيح .. اللي ما شاف ولا فنن .. شاف أي حاجة اتجنن
هيهيهي
‏ ‏

شعر .. يشعر .. فهو شعرور

الخامس
-----
هو الكبير : هو إنت بطلتي تكتبي شعر ليه
هي الكبيرة : ويسألونك عن القوافي .... قل هي زخات الفيافي
هو الكبير : ودة معناته إية في الزمخشري .. احنا بناخد وندي مع بعضينا يعني
هي الكبيرة : يعني بح .. كان فيه منه وخلص
هو الكبير : بس ماتشاوريش بصباعك دة
الجمهور : هاهاهاها
هو الكبير : بجد لازم تكتبي تاني .. صحيح أنا مش باطيق الشعر والشعرا واللي بيقروا الشعر واللي حتي بيشعروا بيه .. بس إنتي لازم ترجعي تكتبي تاني .. فيه ضرورة حتمية
هي الكبيرة 'تسبل عينيها اللي مليانة ماسكرا وتميل عليه' : بجد يا حبيبي
الجمهور يعزف كمانجة : تارارا را
هي الكبيرة : بس ليه التغيير دة .. ما تخبيش عليا
ترررن ترررن
هو الكبير : آلو .. أيوة يا فندم .. تمام حضرتك .. ياسلام .. دة كفاية سؤالك عليا نور لي روحي وموبايلي
هي الكبيرة : مين مين
هو الكبير 'موشوشا' : المدير .. أيوة يا فندم .. الكتاب .. آه طبعا .. دة هدية لا تقدر بمال .. بكرة هنتناقش فيه .. أنا لي الشرف يا فندم مع ألف ألف سلامة
هي الكبيرة : كتاب إية
هو الكبير 'شبه باكيا' : أجمل مائة قصيدة في الشعر الجاهلي
الجمهور : هاهاهاها
هو الكبير : ماهو إنتي لازم ترجعي تكتبي شعر تاني لازم لازم

تيتة ' وهي بتسرح شعرها الكاريه' : يا بني يا ضينايا .. مش قادر علي الحمار
الجمهور : هاهاهاها

قفطان وللا كاجوال

الرابع
-----
هي الكبيرة : هنتابع إية السنة دي .. غير الفخراني يعني
هو الكبير : عايزين نركز مع البرامج الدينية .. فيه إعلانات كتير عن برامج دينية كويسة
هي الصغيرة : هتتابعوا الشيوخ اللي بقفاطين وللا الكاجوال
هو الكبير : عيييب .. رجال الدين لهم احترامهم أيا كان لبسهم
هي الكبيرة : فيه شيخ مشهور أوي وبيطلع في برنامجين في قناتين مختلفتين .. بيطلع في واحدة بقفطان وفي التانية ببدلة .. بصراحة مش قادرة أسلم له دماغي وهو متناقض كدة .. رغم إن المسألة مش لبس بس برضة له تأثير .. يعني باحس ان لبسه بيأثر علي طريقته .. المشكلة إن أغلب البرامج هتلاقيها مركزة علي الفتاوي .. كأننا ناقصين فتي .. أنا أصلا مش مقتنعة بجدوي البرامج دي .. رغم إن فيه دكتورة أزهرية باحب أسمعها أوي
هي الصغيرة : اوعي يكون قصدك الست اللي بتلبس جوانتي إسود .. وبتشاور بصوابعها في عين المذيع دايما
هو الكبير : بلاش تبقوا سطحيين .. تعمقوا
هو الصغير : بلولولؤ .. أنا باغرق
الجمهور : هاهاها
هو الصغير : المهم عندي مواعيد حلقات يوجي
هو الكبير : إكبر بأة .. إنت بتصوم دلوقتي
هو الصغير : أنا مش بافهم البرامج دي .. ومافيهاش ترجمة
الجمهور : هاهاها
هي الكبيرة : تصدق الولد عنده حق .. لغة البرامج دي كبيرة علي ناس كتير .. دة غير التناقض .. دة لو حد فهم يعني .. ولما بيحاولوا يتباسطوا بتبقي لغة حوارهم غريبة جدا بالنسبة لرجال دين .. يبدأوا يقولوا ألفاظ زي اللي بيلقطوها الولاد من الأفلام قال مسايرة للعصر .. مايعرفوش يبقوا وسط .. الله يرحمك يا شيخ شعراوي فاكر كنا بنستني حديث الجمعة بتاعه إزاي .. صحيح كان بسيط جدا وموجه أساسا للبسطاء بس رائع
هي الصغيرة : أنا اللي بيغيظني بصراحة المذيعين .. مش لايقين خالص علي البرامج دي .. تسريحاتهم وكرافتاتهم
هو الكبير : بس دة رمضان .. ولازم نجتهد .. تعرفي إنها حاجة تحير فعلا .. كل حد بيروج للفكر بتاعه .. وكل شوية بيشطحوا أبعد
تيتة ' وهي بتقلب في القنوات' : اللي في الحلة تطلعه المغرفة
هي الصغيرة : أنا عندي فكرة كويسة .. إية رأيكم نعمل زي زمان ونقرا في المصحف المفسر نفسه .. نقرا كل يوم جزء وأنا هاقرا للخبؤ دة وأساعده
هو الصغير : بس ما تقوليش خبؤ لأشرذمك .. أوكي بس بعد يوجي
هي الصغيرة 'بتبص له شذرا' : طيب .. ودي بأة هتبقي الفقرة الثابتة في برنامجنا اليومي
تيتة 'وهي محتارة' : ياولاد مش فاهمة كلامكو .. يادي الشيلة يادي الحطة .. باروح معاكو علي جمل وآجي علي قطة
هو الكبير : مع تحفظي علي لغة حواركم الهباب .. بس صحيح .. ما يجيبها إلا عيالها