بكين بدأت
أقصد دورة الألعاب الأوليمبية والمقامة ببكين
ولأني لست متابعة جيدة فلم تسترع انتباهي أخبار انتقال الشعلة الأوليمبية من هنا لهنا إلي أن تصل لمقرها النهائي في الدولة المضيفة .. أعبر فوق الخبر دوما في دوامة أخبارنا الحلوة
واليوم صادف أن رأيت الحفل الأسطوري في استاد عش الطائر .. أحببت ما أري والذي ذكرني بدورة سول .. يبرع هؤلاء القوم في حشد أنفسهم بهذه الصورة المبهرة دوما .. ربما لأني أحسهم - كما يرونا هم - متشابهين جميعا .. وربما لأعدادهم واستعداداتهم الرهيبة التي تجعلك عادة تشحذ حواسك لإستخراج غلطة حركية .. فلا تجد .. بنات قمرات زي الشربات حلوين مش عارف ليه .. قولوا هيه
المهم .. جاءت مشاهدتي متأخرة نوعا ما فقد بدأ توافد دخول البعثات وطبعا كان الوفد الأول لليونان .. الدولة التي بدأت بها أول أوليمبياد سنة .. مش فاكرة كام قبل الميلاد .. لكن دي كانت معلومة ثابتة فيما نقرأه قبل مسابقات المدرسة .. وبدأ دخول الوفود ومعها تعليقات العائلة
غريبة جدا دول بدأوا بحرف ال جي
يمكن حسب الأبجدية الصيني
تفتكروا مين أكبر بعثة دايما في الأوليمبياد
الإتحاد السوفيتي
صح النووووم
قصدي روسيا يعني
هتلاقي ميت روسيا بس أكبر بعثة بتبقي بتاعة أمريكا
دول بتوع ألمانيا .. شوف موردين ازاي .. يا أخي الأوروبيين دول تحسهم مستحميين دايما
طبعا .. أكل نضيف وهواء نضيف
مصر هتيجي إمتي
الحق دة موريتانيا لها بعثة .. كأن مافيش انقلاب ولا حاجة
فلسطين لها بعثة .. دول خمسة بس .. ربنا يهد البعدا
العراق كمان لها بعثة .. بافرح لما أشوف كدة
بس بعثة صغيرة أوي .. ربنا يجازي اللي كان السبب
اللي كان السبب موجود هو ومراته وهيحيي بعثته دلوقتي
الأفارقة وصلوا .. دول اية دول الجابون
هتشوف الفرق بأة بين الناس اللي فوق والناس اللي تحت
والله دول بيبقوا حلوين جدا ..دة كفاية ألوان لبسهم باموت فيها
دول بتوع البحرين الله يخيبهم .. شايلين صورة الكبير بتاعهم .. الناس كلها شايلة الأعلام وهم .. آه يا عرب
بعثة تركيا مافيهاش واحدة لابسة حجاب
بتوع المغرب وصلوا .. إية كمية الذهب اللي لابسينها بناتهم دي .. دة دهب بجد
هو الجرام بكام اليومين دول
دول بأة بتوع قطر .. دول جامدين في الرياضة دلوقتي
ياعم دول بيجنسوا اللعيبة
هي مصر هتيجي إمتي
آدي بعثة اسرائيل .. نضاف برضة تصدق
الحق دة الأرجنتين فيها واحد لابس طاقية يهود
آه .. ما هي فيها نسبة يهود عالية زي هولندا في أوروبا كدة
فنزويلا .. حاسب ياولد علشان نشوف البعثة كويس
طبعا .. ميس يونيفرس دايما من هناك .. الله يحرقهم
إيران اللي شايل العلم واحدة ست .. تصدق
جزر إيه دي
ودي كمان
دي جزر تابعة لبريطانيا .. تحت التاج البريطاني يعني
ياتري بعثة مصر هتبقي لابسة اية .. فاكرين المرة اللي فاتت .. رمادي في كحلي كئيب .. كنا وحشين أوي
كل بلاد الدنيا لها زي قومي إلا احنا
مصيبة يكونوا هيلبسوهم فراعنة
ولا يمكن ملايات لف
بتوع الدانمارك جتت صحيح .. هو انتم لسة مقاطعين
إية الشوياكة دي .. بص البعثة الإفريقية دي .. لابسين البياضات
هو احنا ممكن نلعب مع اسرائيل في الدورة دي
ساركوزي بيحيي بعثة فرنسا زي بوتين ما عمل
ومين اللي بتحيي بعثة الهند دي
أنديرا غاندي هههه
هي مصر هتيجي امتي
صحيح .. دة جزر ما أنزل الله بها من سلطان عدت .. يمكن بعثتنا تاهت
ربنا يستر ويكون شكلهم كويس .. أصلنا هنبقي متنيلين كالعادة
هو احنا ليه شايفين نفسنا وحشين كدة دايما
مصر أهيه .. علمنا أهوه
لابسين شيك .. معقول
وعددنا كويس فيه أمل نجيب ميداليات
بيضحكوا أهم وفيه بنات روشين ومعاهم كاميراتهم مافيش أي حاجة
مش شايلين صورة
فيه تلات محجبات
كرم جابر شايل العلم .. مش كانوا كرهوه في أم دي بلد
شكلهم حلو .. يفرحوا
ياللا كفاية كدة
وكالعادة تجوجلت حول الحدث .. لقيت ان
مش جايب سيرة بعثتنا مش فاهمة ليه
و
كمان بيقول ان دي أكبر بعثة تشارك بها مصر منذ بدء المشاركات .. وعرفت حكاية استاد عش الطائر دي
مش عارفة ليه افتكرت حكاية احتفالنا الأسطوري بالألفية :( يبدو إن فيه حاجات كدة بتعلم في الذاكرة
ياللا ماعلينا
أوليمبياد سعيد
تحديث صغير
ردا علي التساؤل : متي يمكننا استضافة أوليمبياد .. وجدت هذا الفيديو الذي يعرض جانب صغير من استعداد بكين لاستقبال الدورة الأوليمبية
تحديث آخر
10 أغسطس
سباح إيراني ينسحب من سباق المائة متر ليتحاشي التنافس مع سباح اسرائيلي
