كان المفروض أدبح وأغرق المدونة دم
وأي حد شجيع يحط إيده في دم الضحية أم فروة ويطبع إيده جنب الوردة البنفسجي اللي فوق دي كالعادة المصرية العريقة وتبقي خمسة وخميسة نبيذية اللون
بس أنا لسة ماكملتش خمس سنين تدوين وما أظنش هاكملهم
وكمان أنا ضد تلوث البيئة
وتلوث النظر
وتلوث الدماغ بخرافات الخمسة وخميسة
وكمان الضحية السنة دي مش بفروة
بس أنا طبعا طبعا والحمد لله مش ضد التضحية
ومش ضد الدبح المشروع في مكانه المشروع لأن ريحة الدم بتبقي صعبة جدا وفي كل مكان في أيام العيد الجميلة
أنا مش ضد اللحمة ولا الفتة ولا صينية الرقاق .. طبعا
مش ضد فرحة بالعيد لأن العيد هو الفرحة .. واحنا محتاجين أوي نفرح شوية
أنا مستنية يوم عرفة .. باحب اليوم دة رغم إني ماعشتوش في مكانه .. ربنا يقدرني في يوم وأروح .. بس ناوية الصيام وعايزة أعيشه زي كل سنة عدت .. بس أكتر شوية
أنا مع السعادة المتاحة .. والمباحة .. أصلها إن جيتو للحق قليلة خالص
كان نفسي كمان أحط في البوست دة صورة خروف رغم اني مش باحب اللحمة الضاني ولا باطيق ريحتها .. صورة تدوس عليها الخروف يرقص رقصته الأخيرة .. بس مش عارفة
حاجات كتير كان نفسي أعملها هنا .. في بيتي البنفسجي دة بس ماعرفتش
علو فكرة لون التامبلت دي هو اللي حببني في اللون البنفسجي بدرجاته كنت باكرهه زمان
دة كمان لسة فيه في الدرافت بوستات كتير منها اللي بعنوان واللي من غير
واللي فيه كلام واللي من غير
واللي فيه صورة حطيتها استعدادا لكلام واللي من غير
المهم
العيد دة .. غير
يمكن علشان هاياخدوني لأول مرة وأشوف البقرة بتتدبح .. هربت كتير قبل كدة
بس مافيش مفر أشوفها المرة دي
ياللا
كل سنة وأنتم طيبين
وأشوفكم علي خير
