زرعت كل الصحاري يا بلدنا ورود
لاجل الامل
لاجل يوم لونك الاخضر يعود
وتزهزهي
وتزيدي خير
من اول البحر لغاية أبعد نقطة عالحدود
ورسمت على ورق الشجر
وكف الحجر
غصن الزيتون
والزيزفون
وقلت إنك ملهمة
بالحب دايما ملهمة
وكل دمي فدا أمنك يهون
وكتبت على ضل البيوت
إني أموت
ولا يوم يا غالية يا جميلة
الحزن على رمشك يفوت
وجبت من عند القمر
شعاعين يزيدوا نورك
فوق كل الشعوب
رغم إنك أحلى من كل القمر
في العتمة
ممكن تعبري فوق كل الخطوب
كداب أنا يا بلدنا
اوعي تصدقي
مين دا اللي يقدر يزرع الصحرا
بدون ما الدولة تحبس
ويدوخ كما دوخة الأرملة
في كل مجلس
مين دا اللي ممكن يفتكر يقدر يخضر
دة النهب أكتر
والنيل يا حلوة ديكور عالخريطة
لا له مقام ولا احنا بنعامله تمام
مش عايز أفضل منحني
لكل حد
وهبني حبة قمح او بذرة خضار
لكن بنفضل نضحك على روحنا
ونقول عمار
و ف نفس الوقت
ضهري يا حلوة انقطم
ازرع واخضّر اية
اوعي تصدقي
دة كلام
كلام وطالع من حد اتظلم
كداب أنا
كداب يا بلدنا اوعي تصدقي
كداب انا لو قلت هارسم يوم وألون
هاروح يا جميلة وقتها ورا أبعد شموس
وألبس أساور من حديد
ويقولوا فيه حمار يقدر يعبر!!ا
دة احنا في زمن التيوس
لو حتى كتبت عالحيطة في يوم
يحيا الزعيم
هينفخوني ويقولوا عليا
دا واد لئيم
فيه حد يقصد عمره يهتف للزعيم !!!
ا
قصده الخبيث يولع النار في الهشيم
انا مش هاعيش اليوم اللي أقدر فيه أعبر
كان ابويا أشطر
وجدي أشطر
آل أجيب لك شعاع من عند القمر
هتصدقي
هتصدقي واحد منكفي
على لقمة العيش
يرفع عيونه للقمر
هتصدقي
أنا عايز اعمل كل دة
عايز أخلي الحلم اللي في قلبي حقيقة
عايز أعلي شانك كل لحظة في الدقيقة
لكن من كل قلبي عارف اني باخدعك
إوعي تصدقي
أنا كداب كبير
كداب كبير
معنديش غير اني اهتف باسمك
واعيش واطنش
واقتل أحلامي البريئة
