القضية مش في أيوة أو في لأة
القضية هي زنقة وأي زنقة
واد يا مصري
عايز تعرف إنت بتفكر في إيه
أنا هاقوللك
إنت بتفكر إنك المصري القديم
مضحوك عليه
شاكك إنت في كل حاجة وكل حد
شاكك حتى في كل كلمة تتقاللك بجد
حاسس بخدعة كبيرة عمالين بيمدوهالك
حاسس بأن أيوة وللا لأ الاتنين مهالِك
شايف إنت إن الجيش جايز يكون
لسه ماشي في سكة اللي كان جنون
خايف يخون
خايف إنت بعد ما مُت عالأسفلت عليه تهون
ورغم إن كل الأَمارات كانت في صالحه
تستغربه وتقول ساعات
فيه كتير م الناس يمكن قارشة ملحه
طيب وليه مافيش وضوح؟
ليه الغموض؟
ليه مافيش خريطة بالصح الصريح
تديني وتدي غيري الحل المريح
ليه مافيش برشامة أبلعها أخِف
ليه مافيش برشامة أفتحها أغِش
أيوة.. أنا عايز إجابة وش
أصل الدنيا من حوالينا مقسومة جناحين
وينج شايف إن مصر الحرة قامت تتبني
يبقى لازم نمسح التقسيمة ونهد الجونين
نكتب الدستور على ميا بيضا
ورانا إيه؟
الثورة بتقول كدة لاجل الحياة تصبح سعيدة
وناس تقول إن المراكب الواقفة لازم تسير
السياسة عايزة سنين شد وجدل
واللي متعاص من الآخر هو الفقير
واد يا مصري
عايزني أكمّل إنت بتفكر في إيه؟
إنت بتفكر تاخدها عِنْد
وتلطع اللأة وتحس بانتصار
طول عمرها الأيوة كاتبها لنا الحُمار
طول عمرها راكبانا مهما قلنا لأ
أصلاً ..عُمر ما كانت اللأة إختيار
وساعات تقول هاكتب نعم
تلاقي طعمها في حَلْقك مَرَار
وساعات كتير تقول هاصلي إستخارة
قوم تفتكر إن إخواننا اللي طلعوا م المغارة
قالوا دة واجب شرعي
أم التذاكي والشطارة !!ا
واد يا مصري
حاسس إنت بالتوهان واللخبطة؟
حاسس إن الحياة كدة مُحبِطة؟
حاسس إن الأمر فَتْي وآخر زَرْوَطَة؟
ولا يهمك يا عزيزي واختار بعد فكر
لو حتى تُهت شوية في الآخر هتوصل
لو حتى بمكر
طعم الحرية سكر.. مش كدة؟
جرّب وعيش اللحظة للآخر كدة
جرّب وعيشها يا عزيزي حلاوة الإختيار
كان أد إيه يا مصري طعم القهر مُرّ
