photo:google free
ليه خليت صينية السمك آخر صينية؟
لان العُرف السائد هو أن نتناول السمك في أيام عيد الفطر المبـــ .. السعيد
إيه العلاقة؟ مش عارفة....جايز علشان السمك والكحك مع بعض بيعملوا تلبك معوي عالي الدرجة؟
الشيء اللطيف أن كثير من الناس بيستبدلوا السمك بأي شيء مشابه وخلاص.. أحياناً رنجة.. وأحياناً فسيخ..وذلك للوصول لأقصى درجات التلبك..يمكن
وجايز علشان المفترض إن الناس زهقوا من اللحوم والفراخ والبط والوز والضاني وكاني وماني
آل يعني الناس لاقية كل اللي فات دة وحان الآن موعد أكل السمك
!!
ما علينا
باعتباري سواحلية أصيلة أحب أنوه إن الناس اللي ناوية تاكل سمك في العيد عليها شراؤه قبل العيد بفترة وقبل أن تصبح اسعاره نار فنصاب أثناء السؤال عن الأسعار بصدمات عصبية تجعلنا نقضي العيد في الرعايات المركزة
صينية السمك المذكورة يجب تنفيذها بأنواع معينة من السمك تصلح للصواني .. وطبعاً هذا يختلف باختلاف المكان.. يعني سمك البحر الأبيض غير سمك البحر الأحمر غير السمك النيلي غير أسماك المصارف والترع :) لكن ما لن نختلف عليه هو الطريقة والإضافات
السمك بيحب إيه؟
السمك بيحب زيت الزيتون وشرائح البصل والطماطم والفلفل الأخضر وأعواد الكرفس ومن التوابل الكمون بالطبع بالاضافة للملح والفلفل وفقط
أما الطريقة فهي لا خلاف عليها أبداً
بعد فتح السمك وغسله إن كان وحدات أو شرائح يجب رصه في الصينية وعليه الإضافات المذكورة ورشة زيت حلوة كدة ووضعه على النار لمدة عشر دقائق فقط لا غير
وبعدين
يتم وضعه في الفرن قليلاً حتى يشم الجيران رائحة الخلطة.. يعني حوالي ربع ساعة فقط
وخلاص كدة
ومن هنا تتضح لنا لطافة صينية السمك.. الحقيقة بأعزها جداً.. سريعة وخفيفة
وهي كمان تعزني زي عينيها
:)
كل سنة وأنتم طيبين
وعيد سعيد ان شاء الله
