هذه التدوينة كان من المفروض أن تكون هنا.. لكن لم أجد وقتاً لترجمتها.. أو لأنها تفضّل أن تكون بلغتها الأصلية
الكائن دة هو فعلاً الفلح والململ بتاع حياتى
ـ* سألته بعد فاصل من الشقاوة المركزة: بتحب ماما أد إيه ؟
أجابنى: أد الدنيا كلها.. والفضاء الخارجى
دماااغ
ـ*إعلان كوكا كولا الجديد..جرافيك..بطله فاعل خير يساعد الجميع.. سألنى بعد انبهاره الأول: هو أنا لو عملت زيه كده .. الناس هتحبنى كده؟
أجبته: طبعاً.. بس طبعاً ده كارتون.. تعرف إنك تقدر تعمل إعلان زى ده.. تعمل أنت بنفسك كارتون
وشه نوّر
ـ* سألنى :هو الياء بالانجليش تبقى إيه؟
أجبته: آى
سألنى: والحاء؟
اجبته: مافيش
قاللى: لازم.. لازم يبقى فيه
أجبته: اتش
اكتشفت إنه يرسل رسالة على موقع
mbc3
بعد ما نقل عنوانها وكتبه فى الادريس بار لوحده
عجبنى
ـ* سألنى: يعنى إيه أنتى بيوتك؟
أجبته: دوا
سألنى: عبارة عن إيه يعنى؟
أجبته: ميكروبات
صرخ هارباً منى: ماما بتدينى ميكروباااات
ضحكت
ـ* هو حريف ليدو
اهرب من اللعب معه حتى انتزع منى وعداً باللعب معه غداً
ولما جاء الغد.. سعدت بضحكاته وهو يفوز مرة بعد الأخرى
حرييييف
ـ* جاءنى طالباً منى إغماض عينى والسير وراؤه.. مشيت
وجدته يلصق على باب حجرته صورة سيريالية بالقلم الرصاص على ورقة كراسة
صورة جانبية لى وأنا جالسة إلى ترابيزة الكمبيوتر
حسيت إنها رسالة منه .. ابعدى عن الكمبيوتر شوية .. وخليكى معايا
حااااضر
