Wednesday, June 18, 2008

عندما يهكك أحد

تحذير ‏:‏ هذا البوست عمي ‏..‏ قصدي عامي ‏..‏ مع الإعتذار للغتنا الجميلة ‏..‏ وكمان فرانكو آراب لدواعي الإنجاز في الكتابة مع الإعتذار الجامد أوي للغتنا الجميلة أوي
‏*‏****
ليه
ومين
وازاي
وفين
وكذا أداة استفهام كمان لازم يخطروا في بالك عندما تعلم عزيزي الفاضل أنك تعرضت لهاك .. والهاك طبعا غني عن التعريف .. هو اقتحام لشئ يخصك .. ودعبسة في شئونك .. حاجة كدة زي واحد لابس شراب حريمي فوال علي دماغه وماسك كشاف في ايده وطلع علي ماسورة الصرف ودخل من شباك الأوضة البحري اللي أنت سايبه مفتوح يهوي الشقة .. وقعد يفتش في ورقك و يقلب في دولابك
أنت غلطان
ليه بتهوي الشقة
ليه مش عامل تكييف ومركزي كمان

أمن تعيش متطمن
لأن الأخ الهاكر بيدخل من خلال غلطتك
ودة أعظم درس لازم تتعلمه .. إنك ما تسيبش ثغرة
والثغرات أنواع يا عزيزي الفاضل
قد تكون باس وورد عبيطة وساذجة وممكن استنتاجها .. وتلاقيك بتطمن نفسك .. ماحدش ممكن يتخيل إنها بالعبط دة
أوفضول إنساني نتيجة ضعف حيواني يخليك تفتح رسالة مثلا لأن عنوانها أي لاف يو .. مين بلا خيبة هيكتبلك كدة يعني .. والمصيبة إنك بتبقي شاكك بنسبة مية في المية ان دة فيروس بس ساعة القدر يعمي البصر وتدوس يا معلم .. وتطلع التروجان هورسز علي ملفاتك تضبطها
أو .. حركة ظريفة تخليك تدخل باس ووردك سواء في ايميل او اكاونت فيس بوك في صفحة تانية قال زيادة توكيد يعني وبيبقي جواك حد بيقول دة مش طبيعي اصبر يا عبيط .. بس برضة مفيش فايدة
أو سنيورة غندورة رافعة شعرها في صورة وعايزاك تآدها .. فريرة طبعا وخصوصا لو علي الفيس بوك ومكتوب ان الميوتوال فريندز تلاتة .. أمان يعني .. تدوس تشوف دول مين مش عارف .. آه معلش أكيد اللينك دي مهنجة .. وتأكسبت .. وعيش بأة حيث غالبا ما يكون هذا فخ لدخول بروفايلك لتقليب صورك وخلافه
وآد علي كدة بأة ثغرة خاصة بالبلوتوث .. دي فقرة خاصة بمجانين الموبايل أمثالي .. حيث أن الثغرة تكمن في أن بلوتوثك مفتوح .. لازمن لازمن تقفل بلوتوثك وأنت قاعد ان شالله في اجتماع رسمي أو في حضرة حضرة مديرك .. بلاش الطمع في أغنية طايرة أو كليب عابر يدمرلك جهازك وتظل تلالي بعد كدة
يعني
كل واحد لازم يخلي باله من لغاليغه .. جايز كلامي يكون بايت وقديم .. بس ساعات فيه حاجات بايتة بتكون كويسة .. البامية مثلا .. ودة تحذير للتذكرة والتبصير .. قد تكون بدون أسرار ولكن لو دخل حرامي شقتك الفاضية خالص برضة هتتعب نفساويا .. بيليف مي
نصيحة أخيرة : تحلي عزيزي اللي لسة فاضل بفضيلة الوسواس القهري .. أي تحذير اتبعه .. أي نصيحة لتجنب الاختراقات اعملها و خليها علي سطح ذاكرتك .. بلاش إحساسك الدائم بالأمن والأمان .. أنت في بحر الظلمات .. يا لطيف اللطف يا رب
حواديت للذكري
أفظع اختراق حصللي كان من فيروس ناسية اسمه .. من أربع سنين كدة .. كان بيعمل شت داون للويندوز في شاشة ظريفة بتعمل عد تنازلي كأن قنبلة هتنفجر في وشي .. و دة أيام ماكان عندي ويندوز :( .. وأتذكر أني جبت بحار النت وعديت جبال الويب لغاية ما شلته
أما أحدث اختراق فهو اللعب علي وتر رغبتي في المساعدة .. أصل أكتر عيب فيا العطاء علي رأي نجماتنا الفنانات .. ولقيت أكاونتي علي الفيس بوك مهدد .. فتشت في كل الأبليكاشنز وورا الدباديب وفي بوكيهات الورد وفي الإنبوكس ذات نفسه لكن كل حاجة زي ما هي بحطة إيدي
ويمكن أنا علشان 'فقرية' شوية مش عارفة ليه عايزة أحيي أخينا الهاكر الفاضل ودة لأن الحركة عجبتني .. ريلي .. يعني لازم نشجع اللعبة الحلوة
ياللا أدينا بنتعلم
وأمي الله يرحمها كانت دايما تقول ساعة ما بتاخد بالها : أصل المؤمن لا يلدغ من جحر مرتين
ولما بتتلدغ بأة كانت بتقول : أصل المؤمن مصاب

Posted by بثينــــــة :: 12:25 PM :: 19 Comments:

Post a Comment

---------------------------------------