ـقريت في جريدة صفرا ان مني الشاذلي جاتلها رسايل غرامية علي الموبايل .. عارفة عملت إية
ـمن امتي بتقرا جرايد صفرا
ـواحد زميلي كان جايبها انتي عارفة اني ما باشتريش النوعية دي من الجرايد علشان ماأنفعهومش
ـبس مفروض كمان ما تقراهاش
ـدة مجرد استطلاع لأدمغة الناس دي .. نرجع لمني الشاذلي
ـآه صحيح عملت إية
ـجوزها اللي راح عمل بلاغ عادي .. ست محترمة حاسة رغم أهميتها إنها في 'كنف' راجل
ـآآآه .. صحيح .. برافو عليها .. دة رغم إن الخال قال عليها متشافة
ـهي فعلا مصنفة في القمة .. مين الخال دة
ـ الأبنودي .. تعرف ليه بيقولوا عليه الخال مش العم
ـ ليه
ـ دة علشان ناحية الأم الأقرب والأحن والأكثر حميمية
ـ طيب تعرفي الفرق لما حد يشتم حد ب يلعن أبو أهلك عن الشتيمة ب يلعن أبو ناسك
ـ هو فيه فرق
ـ طبعا .. الأهل هم أهل الأب .. العصب .. لكن الناس هم أهل الأم
ـ متهيألي مادام شتيمة ما تفرقش
ـ لأ طبعا .. شتيمة أهل الأم توجع أكتر لأنها شئ بيمس الشرف
ـ بمناسبة الشرف .. سمعت إنهم عملوا جايزة في أمريكا للمقبلين علي الزواج بدون إقامة علاقة كاملة قبله لنشر ثقافة العفة بس ماحدش اتقدم
ـ لو عملوها هنا مش هيلاحقوا .. بس لو خلوها للمتزوجين فعلا ههههه .. ربنا يهدهم عايزين يبقوا أحسن في كل حاجة
ـ صحيح .. احنا ربنا أخد منا كل حاجة إلا الشرف .. وحتي دة بنسبة كبيرة مش بنحافظ عليه قصدي بكل معانيه يعني
ـ بس إنتي إيه رأيك في أوباما
ـ كواحدة شافت مسلسل الجذور وهي في سن التكوين أقوللك إني فرحت جدا .. وكمان بعد كدة برضه شفت ذهب مع الريح وعرفت أد إيه الشعب دة تعب علشان يعمل بلده
ـ دول كلهم أول عن آخر مائتين سنة
ـ واحنا كنا عملنا إية بالسبع تلاف سنة بتوعنا .. البنت طلعت رحلة المتحف المصري حكيتلك عليها
ـ لأ هو فيه حاجة حصلت
ـ أبدا .. قالت لي إنها زهقت ومدرسة الدراسات الإجتماعية كانت بتتفرج علي الأجانب وماشرحتش أي حاجة
ـ مش مشكلة نروح احنا بس لازم نذاكر الأول .. هي إية أخبار المذاكرة
ـ تمام .. تفتكر موضوع الكادر هيخلي المدرسين يبطلوا زن علي الدروس الخصوصية
ـ ولا مليون كادر .. أنا باتجنن لما أحط نفسي مكان مدرس .. دة مرتباتهم ماتجيبش عيش حاف
ـ فعلا حتي من المدعم بالعلف هيهيهي .. إنت عارف إية أكتر حاجة مستغربة لها في الدنيا دي
ـ إية
ـ النشيد اللي قاله الولد امبارح : تحيا جمهورية مصر العربية .. واحد فول واتنين طعمية
