إركب حصانك وإمسك لجامه وطير
الأرض قدامك ثابتة ومش هتطير
إنت اللي تقدر توصل أبعد مكان في الكون
لو حاسس إن الملك بكشة واحدة يطير
***
عارف حصانك لو مرق .. هيوصلك لبعيد
وهتنسي كل القلق .. وأجندة المواعيد
ليلك نهارك برق .. واللحظة عمر جديد
خيال وعايش دنيتك .. وماسكها قبضة إيد
***
سيبك من الألوان وارمح في أرض الله
أبيض أو أسود سيان .. الأرض أرض الله
سيب الحصان رماح .. وارمي وراك همك
وعيش وآمن بنفسك وانسي اللي فات انساه
***
وجع الدماغ م الصدا والخيبة والركنة
والوقفة محلك سر في الضلة والسكنة
إمسك لجامه وشد ضهرك وإرمي عينيك قدام
وانسي زمان الإسطبل والربطة والمحنة
***
من وحي وعكة تلتها استفاقة وبإلهام من المطرب فهد بلان-لو حد فاكره
:D
