اسأل عليها فتحي
وعنترة وجيهان
وقيس بن الملوح
واسأل كمان حنان
الكل يعرفوها
ويمكن جربوها
ويمكن هربوا منها
شافوها ضعف وجنان
هسهس قديم وأزلي
بيصيب أبو قلب دافي
ويخليه يمشي حافي
يسهر بالليل يتنح
وبالنهار كمان
لو جاتلك يا صديقي
في عصرنا اللي حالي
هتجيب دبدوب .. وأحمر
وتروح على طول تخبط
على باب بنت الجيران
وتجيب الورد أحمر
وتعيش احمر في احمر
وعلاجك الوحيد
اللي يخليك سعيد
وتعود تاني لطبيعتك
قلبك جامد .. حديد
انك تروح لشيخ
عنده دفتر كبير
وغالبا بيلبس
عمة وقفطان طويل
ويروح مسجل اسمك
وتسمع الزغاريط
كدة بقيت عبيط
وكمان كدة شفيت
ونسيت اسمك كمان
ساعتها يا عزيزي
هيدق كل قلبك
فقط علشان تعيش
هتنسى الورد الأحمر
وتنسى تهمس وتسهر
بس فـ نومك تفكر
ازاي تقدر تعيش
ويمكن تبقى فلتة
وتعيش شوية منها
رغم طاحونة مافيش
أو يمكن تشتهيها
لما تهيس وتكبر
وتلعب حبة.. تهنكر
مع واحدة طبعا أصغر
بس هتفوق وتنكر
وتقول دة العمر عدّى
وتعيش بس تغني
لحليم واسمهان
