تقدر تقول انه اقوى اختراع
وثورة قوية للم اللي ضاع
وخدمات كتير وترفيه كتير
وأخبار تجيلك بضغطة صباع
تلاقي فيه العلوم اللي هيه
وتلاقي فيه الآراء القوية
وفيه القباحة وسماحة وسياحة
دي شبكة وجامعة سكان البرية
وبدأت هنا عندنا من زمان
غالية وبطيئة وآخر جنان
وبدأنا عصر الشبك الوسيع
وصلنا وجلنا وقلنا أمان
وبعدين سابولنا الهوا والفضاء
وقالوا السما في ايدين من يشاء
هلموا انبحوا وزيدوا نباحا
هيعمل ايه النباح في الوباء
سابونا نكتب ننفس عليه
وقالوا دي حرية ومعرفش ايه
وقالوا مافيش حتى ريحة رقابة
وكان هو مصدر يقارفونا فيه
راقبوا الكلام اللي في الجو طاير
وقفلوا شبابيك اللي صابر وحاير
وكل ما تحصل مصيبة يلموا
كل اللي كان على الشاشة ثاير
وبقينا نحسس سوا ع الكلام
ونقول بالهوادة لنروح في التمام
ونلقى قفانا ازرق ووارم
وتبقى عيشتنا طين او سخام
وقاللك لا مش كفاية المهاودة
لازم تراقب كل اللي عدى
وساب كلمة وحشة في حق النظام
وتمسح والا تعيش زاوية حادة
وقالوا رخيص ومتاح في البيوت
وتقدر تشوف العالم.. تفوت
لكن نفسك هيحسب عليك
يا تلعب يا ترغي..م الآخر سكوت
