عايزة أحكي حكاية بينوكيو
عارف بينوكيو؟ا
بينوكيو الجميل الرفيع في حواديت زمان
فاكره وهو بيجري ويلعب
فاكر ركبه وهي تخبط
واوعى
اوعى تقول لي كانت تخبط على باب جيران
بينوكيو الخشب
فاكر قصصه وكل حكاياته
دي كانت تحفة .. كانت جنان
أنا فاكره شكله وهو بيجري
وفاكره أبوه اللي عمله خشب
عمله خشب
عمله وفاكره هيقعد ويسكت
أراجوز عبيط
فاكر إنه عشان بس ركب خشب
ودق في خشبه مسامير خشب
خلاص اشتراه!!ا
بينوكيو زهق
ولما هرب في ليلة شجاعة
خاف وارتعش من قلة هدومه
وخطف البرد أمنه ونومه
ما هو يا سيدي في أصله خشب
ومين في الدنيا أهبل يلبس خشب
يدفي خشب
مين فينا عمره حس بلعبة
وحس إن فيها قلب وحياة
بينوكيو هرب
وراح جنب بيت منور في عتمة
راح جنب نار قايدة .. نفسه في دفا
خشبه اتلسع
وكان هيبقى في ثانية رماد
لولا اندفع
بينوكيو رجع
محني الجبين
خايف من البرد ومن كل حاجة
ساعات باحس بينوكيو أنا
ولما حس بنفسه خشب
خاف واترعب
نفسه يكون مش خشب
مش خشب
بينوكيو كان مخنوق م الألم
وأصبح شقي
أصبح هروبه شئ اعتيادي
وكدبه كمان اعتيادي وعادي
يكدب وأخته تقول له خليك مؤدب
الكدب عيب
فيه ناس بتكدب ورجليها تقصر
وناس تانية تكدب ومناخيرها تطول
وأنت كل ما تكدب هتتعب
امسك نفسك عن الكدب حبة
وحبة في حبة هتبقى حقيقي
زيي حقيقي
ويموت الخشب
بينوكيو .. أنا
أكدب وأكدب
ومناخيري تطول
بينوكيو بيكدب كتير غصب عنه
شايف دنيا بعيدة وجميلة
نفسه يكون كل حاجة
ينول كل حاجة
يعيش كل حاجة
ويلعب ويلعب
نفسه يبطل خوف م النيران
وما يبقاش خشب
وينسى إنه يكدب
ويكدب
ومناخيره تطول ساعات وساعات
بينوكيو أنا
بينوكيو أنا
عارف نهاية كل حكاية ؟ا
خليك معايا
ألملم في نفسي وأنا بس باختم
علشان النهاية .. غبية النهاية
بينوكيو مات
سمع الكلام
وقع وانكسر
وقام من ضلوعه ولد مش شقي
ولد مش بيكدب
ولد مش بيبكي ويضحك ويلعب
ولد مولود برجلين قصيرة
ومناخير طويلة
ولد اعتيادي .. وعادي
عرفت بينوكيو ؟ افتكرت الحكاية ؟ا
بينوكيو .. بينوكيو
الأراجوز الخشب
أنا بينوكيو
وبينوكيو أنا
