photo:google free
صينية/طاجن/برام الأرز المعمّر
والسؤال الذي سيخطر على بال أي قاريء..معمّر بإيه؟
الحقيقة إنه مش معمّر بحاجة معينة
:)
هو كدة.. جرى العُرف على تسميته كدة رغم إنه مش معمّر فعلياً بشيء
والحقيقة إن هذا الصنف أشعر دوماً أنه صنف عائلي حِكر على عيلتنا رغم إنه طبعاً صنف معروف للجميع.. ولكن ربما لأني لم آكله أبداً خارج البيت ولم أجده في أي مطعم
حديثي عن الأرز المعمّر الفلاحي وليس الأرز بالخلطة
!!
والفارق بينهما كبيـــر
:)
فالأرز المعمر في مفهومي هو البرام المسكّر.. بينما الأرز بالخلطة فهو المُملّح والمنتشر في كل المحافل والمطاعم والذي تتكون خلطته غالباً من "أشياء " الفراخ والمكسرات
حكت لي أمي الله يرحمها أن طاجن الأرز المعمر المسكّر هذا كان يتم إعداده – كدة
يعني ليس بالقصد ولا بالتعمد.. بل كان يُُعد عندهم بالمرة ولأن الفرن البلدي في بيت جدي شغال وحامي فنعمل حاجة كدة وخلاص
!!!
النظرية النسبية بتاعة أمي دي غلط غلط غلط
كانت دايماً تقول إن الست الشاطرة لازم تضرب شوية عصافير بحجر واحد.. يعني لو هنشغل الفرن يبقى نرتب نعمل كاااام حاجة مع بعض.. مافيش مانع من برام معرفش إيه وللا صينية إية.. أو حتى تحميص إيه.. دة على أساس إن المواد الخام موجودة وبوفرة وبدل ما الحاجة تبوظ نفنن
ودة كان كلام أمي
والكلام دة أصبح غلط .. أصلاً عند معظم البشر في بلدنا إعداد صنف يتيم وتشغيل فرن دة يوم عيد واكتشفت وانا ماشية كدة في الحياة ان فيه ناس بتطبخ مرة في الاسبوع .. والاكتشاف دة كان من كام سنة تلاقيهم بيطبخوا مرة في العمر دلوقتي.. ومش هاقول أكتر من كدة
الله يـــ .... اللي كانوا سبب تغير نظرياتنا النسبية
عودة إلى الطاجن
رغم أن طاجن أمي كان من اللذاذة والروعة لأبعد حد إلا أنها كانت دوماً تؤكد أن طاجن جدتي في الفرن البلدي أروع وألذّ لأن الفرن البلدي له شمخة.. حلوة شمخة دي
وإحقاقاً للحق فقد بهدلني هذا الطاجن وسلبني كل الحليب الموجود في البيت عند إعداده لأنه كان بيتحجر !! وكان علي تليينه.. ولكني توصلت بعد زوال غشاوة الهبل والتجريب إلى مقاديره المضبوطة
وحتى لا نتوه من بعض وسط الذكريات
نقدر نقول إن كيلو الأرز بياخد اتنين كيلو لبن من الآخر كدة
الأرز يتنقع ييجي نصف يوم الأول بعد غسله وبعدين يوضع في البرام
وتوضع عليه الإضافات: زبدة- قشطة – زبيب- جوز هند – فانيليا "أو جوزة الطيب"
ولا يُنصح بجوزة الطيب هذه لمن كانت دماغهم خفيفة
:)
ومن الجائز وضع مكسرات مع مراعاة أن تكون محمصة
واللبن يُحلّى ويُسخّن ويُصب على البرام وعالفرن عِدِل لمدة ساعة كدة أو لغاية وشه ما يحمرّ
ملاحيظ مهمة
مفترض إن وشه يحمرّ
ومفترض إنه يكون حاجة ماحصلتش
ومفترض إن اللي يعمله يدعيلي
:)
